Rupali Chakankar ED Inquiry: रूपाली चाकणकरांच्या अडचणीत वाढ; SIT चौकशीनंतर आता EDची एन्ट्री

Rupali Chakankar News: राष्ट्रवादी काँग्रेसच्या नेत्या आणि राज्य महिला आयोगाच्या माजी अध्यक्षा रुपाली चाकणकर( Rupali Chakankar) यांच्या अडचणी आणखी वाढण्याची शक्यता निर्माण झाली आहे. नाशिकमधील भोंदू अशोक खरात प्रकरणात एसआयटी चौकशीनंतर आता अंमलबजावणी संचालनालय (ED) आता त्यांची चौकशी करणार असल्याची माहिती सुत्रांनी दिली.

सूत्रांच्या माहितीनुसार, चाकणकर यांना ईडीकडून समन्स बजावण्यात आले असून लवकरच त्यांची सखोल चौकशी होण्याची शक्यता आहे. याबाबत साम टिव्हीने बातमी दिली आहे. दोन दिवसांपूर्वीच एसआयटीने (SIT) रूपाली चाकणकर यांची तब्बल साडेपाच तास चौकशी केली होती.

या चौकशीत अनेक आर्थिक व्यवहार, काही संस्थांमधील सहभाग आणि पदाचा गैरवापर करून निधीची देवाणघेवाण झाली का, याबाबत प्रश्न विचारण्यात आल्याची माहिती आहे. त्यानंतर आता ईडीनेही या प्रकरणात प्रवेश केल्याने राजकीय वर्तुळात मोठी खळबळ उडाली आहे.

विशेष म्हणजे, ‘शिवनिका’ संस्थेशी संबंधित आर्थिक व्यवहारांचीही ईडीकडून तपासणी होणार आहे. या संस्थेमधील निधी, व्यवहारांचे स्वरूप, पैसे कुठून आले आणि कुठे वापरण्यात आले याचा बारकाईने तपास केला जाणार असल्याची माहिती समोर येत आहे. काही व्यवहार संशयास्पद असल्याचा प्राथमिक अंदाज तपास यंत्रणांनी व्यक्त केल्याचे सांगितले जात आहे.

या संपूर्ण प्रकरणातील मुख्य आरोपी अशोक खरात याच्यावर खंडणी रॅकेट चालवून ‘बेनामी’ बँक खात्यांच्या जाळ्यातून तब्बल 70 कोटी रुपयांहून अधिक रक्कम वळवल्याचा गंभीर आरोप आहे. या पैशांचा वापर नेमका कुठे झाला, त्याचा कोणाला फायदा झाला आणि या नेटवर्कमध्ये आणखी कोणाचा सहभाग आहे का, याचा तपास आता ईडी करणार आहे.

ईडीकडून पुढील काही दिवसांत चौकशीचा प्राथमिक अहवाल सादर होण्याची शक्यता व्यक्त केली जात आहे. या चौकशीतून आणखी काही धक्कादायक माहिती समोर येऊ शकते, अशीही चर्चा राजकीय वर्तुळात सुरू झाली आहे.