Smart Meter Row : 5 हजारांहून थेट 20 हजार बील, शिंदेंच्या मंत्र्यानेच केली स्मार्ट मीटरची पोलखोल; अखेर महावितरणने दिलं स्पष्टीकरण

Jalgaon News, 30 Jul : राज्यात स्मार्ट मीटर हा वादाचा विषय बनला आहे. विधिमंडळात स्मार्ट मीटर बसवण्याची सक्ती नाही, असा दावा केला जातो. प्रत्यक्षात मात्र जबरदस्तीने मीटर बसवल्याच्या तक्रारी आहेत.

स्मार्ट मीटर बसविल्याने विजेचे बिल वाढीव येते ही ग्राहकांची तक्रार आहे. अनेक नागरिकांनी याबाबत लोकप्रतिनिधी, आमदार आणि मंत्र्यांकडे तक्रारी केल्या आहेत. त्यामुळे हा राजकीय वादाचा विषय बनला आहे.

विरोधी पक्षाच्या नेत्यांनी स्मार्ट मीटरविरोधात राज्यभर आंदोलन सुरू केले आहे. स्मार्ट मीटर ग्राहकांच्या संमतीशिवाय बसवू नये, अशी मागणी विरोधकांनी केली आहे. त्यासाठी अनेक शहरांमध्ये सरकार विरोधात आंदोलन सुरू केलं आहे.

राज्य सरकार स्मार्ट मीटरचे समर्थन करीत असतानाच जळगावमध्ये पालकमंत्री गुलाबराव पाटील यांनी स्मार्ट मीटरची खिल्ली उडवली होती. आपल्याला पाच हजार रुपये बिल येत असताना स्मार्ट मीटरमुळे ते वीस हजार झाले असे विधान त्यांनी केले होते. खुद्दमंत्रांनीच स्मार्ट मीटरची पोलखोल केल्याने खळबळ उडाली.

पालकमंत्री गुलाबराव पाटील यांनी स्मार्ट मीटर विषयावर जनतेची बाजू घेतली. त्यामुळे महावितरणच्या प्रशासनातही एकच धावपळ उडाली. महावितरणच्या प्रशासनाने धावपळ करीत यावर खुलासा केला आहे.

पालकमंत्री गुलाबराव पाटील यांना कोणत्याही एका महिन्याचे बिल 20 हजार रुपये आलेले नाही, असा खुलासा करण्यात आला. त्यामध्ये प्रशासनाने शब्द चालाखी केल्याचे पुढे आले. गुलाबराव पाटील यांच्या घरावर सौर प्रकल्प बसविला आहे. त्यामुळे विजेचे बिल आपोआपच त्यातून वजा होते. ही वस्तुस्थिती मांडणे महावितरण जाणीवपूर्वक विसरले की काय? अशी स्थिती आहे.

पालकमंत्री गुलाबराव पाटील यांनी स्मार्ट मीटर बाबत केलेल्या विधानाचा बाण राज्य सरकार आणि महावितरणच्या जिव्हारी लागलेला दिसतो. विज कंपनीने तातडीने धावपळ करीत यावर खुलासा केला. मात्र त्यातून एक नवा राजकीयवाद उभा राहण्याची शक्यता आहे. त्यामुळे पालकमंत्र्यांचा स्मार्ट तीर सरकारच्या जिव्हारी लागला की काय? अशी चर्चा आहे.