'मातोश्री, बाळासाहेब, उद्धव ठाकरेंवर कधीही टीका करणार नाही'

जळगाव : 'आजही आमच्या मनात उद्धव ठाकरे यांच्याविषयी आदर आहे. आम्ही कालच सभागृहात बोललो, उद्धव ठाकरेचं (Uddhav Thackeray) आमचे साहेब आहेत. आमच्यातील कोणीही ठाकरे कुटूंबावर टीका करणार नाही, बाळासाहेबांवर तर मुळीच नाही आणि आदित्य ठाकरेंवरही (Uddhav Thackeray) नाही. अशी प्रतिज्ञा केली आहे. अशी प्रतिक्रिया जळगावचे गुलाबराव पाटील (Gulabrao Patil) यांनी दिली आहे. ते जळगावमध्ये माध्यमांशी बोलत होते. (Gulabrao Patil Latest news)

यावेळी बोलताना पाटील म्हणाले की, मातोश्री आमच्यासाठी आदरस्थानी आहे, मातोश्री आमचा देव्हारा आहे, देव्हाऱ्यातला देव जरी आमच्याकडे बघत नसला तरी आम्ही देवाकडे बघतो. म्हणून आम्ही कोणीही मातोश्रीवर टीका करणार नाही, अशी प्रतिज्ञा केली आहे. उद्धव ठाकरेंना काही लोकांनी फसवण्याचा प्रयत्न केला आहे आणि त्यामुळेच असे दिवस आले आहेत. मी कालही सभागृहात हात जोडून विनंती केली, की अजूनही सावध रहा, या लोकांना दूर करा आणि आपलं कार्य पुढे सुरु ठेवा,अशी विनंती गुलाबराव पाटील यांनी केली आहे.

मी गुवाहाटीला असताना लोकांचे फोन आले, त्यांनी परत येण्याची मागणी केली. पाटील उद्धव ठाकरेंना धोक देणार नाहीत असं सर्वांना वाटत होतं. पण ज्यावेळी आमच्या जिल्ह्यातले ४ आमदार गेले तेव्हा आम्ही २० आमदार उद्धव ठाकरेंना भेटलो आणि त्यांना परत बोलवण्याची मागणी केली. एकनाथ शिंदे हा मराठा, बहुजन समाजाचा चेहरा आहे. ते आपल्या पक्षात असणं गरजेच आहे पण ते म्हणाले की तुम्हाला जायचं असेल तर तुम्हीही जा, मग जर ४० आमदार एकाच वेळी जात असतील आणि त्यांना दखल घ्यायची नसेल तर काय करणार, अशी खंतही त्यांनी व्यक्त केली.

आम्ही बंडखोर नाही, शिवसेना वाचवण्यासाठी आम्ही हा उठाव केला आहे. बाळासाहेबांचं घर जळतयं ते घर वाचवण्यासाठी आम्ही हे पाऊल उचललं आहे. आतापर्यंत ज्यांनी शिवसेना सोडली ते दूसऱ्या पक्षात गेले आणि त्यांनी पदं मिळवली. पण आम्ही पदं सोडून शिवसेनेला वाचवायला बाहेर पडलो आहोत. त्यामुळे आम्ही आमचं घर वाचवायला निघालो असल्याचं गुलाबराव पाटील यांनी सांगितलं.