Maratha Reservation : मराठा समाजाला आरक्षण देण्यास विलंब का होत आहे?

Malegaon Congress news : शासनाने शांतताप्रिय पद्धतीने आंदोलन करणाऱ्या मराठा समाज बांधवांवर केलेला लाठीमार निषेधार्ह आहे. काँग्रेस पक्षासह आम्ही त्याचा निषेध करतो. मराठा व मुस्लिम बांधवांनाही आरक्षण मिळालेच पाहिजे, अशी मागणी काँग्रेसचे आमदार वजाहत मिर्झा यांनी केली. (State Government should give Reservation for Maratha as well Muslims)

मालेगाव (Malegaon) येथे (Congress) आमदार वजाहत मिर्झा यांची पत्रकार परिषद झाली. त्यात त्यांनी भाजपचे (BJP) सरकार मराठा (Maratha) समाजाला आरक्षण देण्यास विलंब का करते असा प्रश्न केला?

यावेळी आमदार मिर्झा यांनी भाजपच्या राजकारणावर टीका करीत, हा पक्ष समाजा-समाजात फूट पाडण्याचे काम करीत असल्याचा आरोप केला.

ते म्हणाले, देशातील जनतेच्या सुख-दु:खाशी सोयरेसुतक नसलेले नेते रेडिओच्या माध्यमातून ‘मन की बात’ करतात. काँग्रेसचे नेते राहुल गांधी यांनी मात्र जनतेचे सुख- दु:ख व अडीअडचणी समजून घेण्यासाठी कन्याकुमारी ते काश्मीर अशी साडेचार हजार किलोमीटरची पदयात्रा केली.

राहुल गांधी थेट लोकांना भेटले. त्यांच्या अडचणी, दुःख समजून घेतले. त्यामुळेच लाखो लोक त्या यात्रेत सहभागी झाले. या यात्रेला भरभरून मिळालेला प्रतिसाद म्हणजेच देशातील जनमत इंडिया ‘आघाडी’च्या बाजूने आहे. ‘नफरत की बाजार मे प्रेम’ वाटण्याचे काम काँग्रेस पक्ष करीत आहे, असे वक्फ बोर्डाचे अध्यक्ष, आमदार मिर्झा यांनी सांगितले.

ते पुढे म्हणाले, भाजप सरकारच्या काळात महागाई गगनाला भिडली आहे. बेरोजगारी वाढली आहे. तरुणांसह शेतकरी, शेतमजूर, कष्टकरी सर्वांमध्ये शासनाबद्दल रोष व नैराश्‍याची भावना आहे. मोठमोठ्या घोषणा करून थापा मारण्यातच भाजपचे नेते गुंग आहेत. जातीय विद्वेष पसरवून राजकीय पोळी भाजण्याचे काम ते करीत आहेत. अल्पसंख्याक समाज बांधवांवर अन्याय, अत्याचार सुरू आहेत.

यावेळी पक्षाचे जिल्हाध्यक्ष एजाज बेग, जमील क्रांती, जैनू पठाण, हाफीज इंतिया, गफ्फार शेख, तय्यब खान, अलिम खान, कय्युम खान आदींसह काँग्रेसचे पदाधिकारी व कार्यकर्ते उपस्थित होते.