Chhagan Bhujbal News: येवला शहर अन्न व नागरी पुरवठा मंत्री छगन भुजबळ यांच्या मतदारसंघात आहे. त्यामुळे ही नगरपालिका निवडणूक मंत्री भुजबळ यांच्यासाठी प्रतिष्ठेची आहे. त्या दृष्टीने त्यांनी स्वबळावर सर्व तयारी केली आहे.
अन्न व नागरी पुरवठा मंत्री छगन भुजबळ यांचा येवला नगरपालिकेवर गेली अनेक वर्ष वरचष्मा राहिला आहे. यंदाही त्यांनी स्वबळाची तयारी केली आहे. येवला नगरपालिका निवडणुकीत महायुती होणार की नाही? याचे उत्तर नक्कीच नाही असे आहे.
भाजप कोणाशी युती करणार हे आज तरी गुलदस्त्यात आहे. मंत्री छगन भुजबळ आणि त्यांचे कट्टर विरोधक शिवसेना एकनाथ शिंदे पक्षाचे माजी आमदार नरेंद्र दराडे यांच्यात लढत अपेक्षित आहे. त्याबाबत भाजपचा निर्णय उद्या (ता.१०) निर्णय होण्याची चिन्हे आहेत.
शिवसेना एकनाथ शिंदे पक्षाचे माजी आमदार नरेंद्र दराडे नगरपालिका निवडणुकीत मंत्री भुजबळ यांना आव्हान देणार आहेत. दराडे यांचे कुटूंबकेंद्रीत राजकारण नगरपालिका निवडणुकीतही खेळले जाईल. मात्र दोघांनाही राजकीय धोका नको असल्याने भाजपची साथ हवी आहे.
येवला शहरात भाजपचा मतदार आहे. या स्थितीचा पुरेपूर फायदा भाजपच्या नेत्यांनी मंत्री भुजबळ आणि दराडे यांच्याशी चर्चा करताना उठवला आहे. भाजपने थेट नगराध्यक्ष पदाची उमेदवारी मागितली आहे. भाजपची ही मागणी मंत्री भुजबळ आणि माजी आमदार दराडे यांना अडचणीची ठरणारी आहे.
भाजपचे निवडणूक प्रभारी आमदार डॉ राहुल आहेर यांच्या उपस्थितीत शनिवारी येवल्यात बैठक झाली. यावेळी इच्छुक उमेदवारांची चर्चा करण्यात आली. भाजपने स्वबळावर निवडणूक केल्यास सर्व प्रभागात उमेदवार उपलब्ध आहेत, असा फीडबॅक यावेळी देण्यात आला.
त्यानंतर आमदार डॉ आहेर यांनी मंत्री छगन भुजबळ यांच्या कार्यालयात पदाधिकाऱ्यांची चर्चा केली. यावेळी भुजबळ भाजपशी युती करण्यात उत्सुक असल्याचे सांगण्यात आले. यावेळी नगराध्यक्ष पदाची उमेदवारी भाजपला देण्यात यावी असा प्रस्ताव दिल्याचे कळते.
मंत्री भुजबळ यांच्याकडे सर्व प्रभागांसाठी उमेदवार तयार आहेत. नगराध्यक्ष पदासाठी तीन प्रबळ उमेदवारांनी भुजबळ यांच्याकडे दावा केला आहे. माजी आमदार नरेंद्र दराडे यांना मात्र नेहमीप्रमाणे नगराध्यक्ष पद आपल्याच कुटुंबात हवे आहे. त्यामुळे दराडे यांच्या कौटुंबिक राजकारणापेक्षा मंत्री भुजबळ यांच्याशी राजकीय सख्य करण्यास भाजपचे पदाधिकारी उत्सुक आहेत.
दरम्यान शिवसेना एकनाथ शिंदे पक्षाचे माजी आमदार नरेंद्र दराडे आणि मंत्री छगन भुजबळ यांच्यात राजकीय वाद सर्वश्रुत आहे. त्यामुळे येवला नगरपालिका निवडणुकीसाठी महायुती फिस्कटल्यात जमा आहे. आता भाजपची साथ मात्र दोन्ही गटांना हवी आहे.
भाजपने दिलेला प्रस्ताव मात्र गैरसोयीचा असल्याने, मंत्री भुजबळ यांच्या समर्थकांनी त्याबाबत आपली प्रतिक्रिया दिलेली नाही. एकंदरच महायुती फिसकटली तरीही भाजपची साथ मात्र राष्ट्रवादी काँग्रेस अजित पवार आणि शिवसेना शिंदे या दोन्ही पक्षांना हवी आहे. त्यावर काय निर्णय होतो याची आता सगळ्यांना उत्सुकता आहे.
--------
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.