Eknath Shinde News : आमदार गायकवाडांनी केला करेक्ट कार्यक्रम; शिंदे गटाचा काँग्रेसला मोठा धक्का

Buldana News : मुख्यमंत्री एकनाथ शिंदे (Eknath Shinde) यांनी शिवसेनेला अनेक धक्के दिल्यानंतर आता त्यांनी आपला मोर्चा इतर पक्षांकडे वळवला आहे. विविध पक्षातील नेते शिंदे गटात प्रवेश करत आहेत. आता शिंदे गटाने बुलडाण्यात काँग्रेसला (Cpngress) चांगलाचा धक्का दिला आहे.

बुलडाण्यात काँग्रेसच्या 8 नगरसेवकांनी शिंदे गटात (बाळासाहेबांच्या शिवसेनेत) प्रवेश केला. या 8 नगरसेवकांचा जाहीर सत्कार शिंदे गटाचे बुलडाण्याचे आमदार संजय गायकवाड (Sanjay Gaikwad) यांच्या हस्ते करण्यात आला. मोताळा आठवडी बाजार येथील मैदानावर जाहीर सभेत काँग्रेसच्या 8 नगरसेवकांनी शिंदे गटात प्रवेश केला.

त्यामुळे काँग्रेसला हा मोठा धक्का मानला जात आहे. एकीकडे पदवीधर मतदार संघातून काँग्रेसचे धीरज लिंगाडे निवडून आले आहेत. त्याचा आनंद साजरा करण्याच्या तयारीत असलेल्या काँग्रेसला आज मोठा धक्का बसला. कारण जिल्ह्यातीलच मोताळा येथील नगरसेवकांनी शिवसेना शिंदे गटात जाहीर प्रवेश केला.

आमदार गायकवाड यांनी काँग्रेसच्या नगरसेवकांनी घेतलेल्या निर्णयाचे स्वागत केले. नगरपंचायतमध्ये लवकरच बाळासाहेबांची शिवसेना पक्षाची सत्ता स्थापन करून आपण शहराच्या विकासाला चालना देऊ, असे आश्वासन यावेळी गायकवाड यांनी दिले.