Bachchu Kadu Drought Relief Demand : दुष्काळग्रस्तांच्या मदतीवरून बच्चू कडू आक्रमक; सत्ताधारी शिंदे शिवसेनेच्या आमदाराने सरकारलाच सुनावले!

Maharashtra Drought Relief : दुष्काळामुळे शेतकरी आर्थिक संकटात असताना दिवाळीसाठी दिली जाणारी पाच हजार रुपयांची मदत अपुरी असल्याचे सांगत बच्चू कडू यांनी सरकारला घरचा आहेर दिला आहे.

दुष्काळग्रस्त शेतकऱ्यांना दिवाळीसाठी 10 ते 15 हजार रुपये, तर दुष्काळी अनुदान म्हणून प्रतिहेक्टरी 50 हजार रुपये देण्याची मागणी त्यांनी केली.

दुष्काळ, नापिकी आणि वाढता उत्पादनखर्च यामुळे शेतकरी आधीच आर्थिक संकटाचा सामना करत आहेत. अशा परिस्थितीत दिवाळीसाठी सरकारकडून (Government) दिली जाणारी पाच हजार रुपयांची मदत पुरेशी कशी ठरणार? आजच्या महागाईत एवढ्या रकमेत कुटुंबाचा सण तरी कसा साजरा करायचा? असा सवाल उपस्थित करत एकनाथ शिंदे यांच्या शिवसेनेचे आमदार बच्चू कडू यांनी सरकारच्या मदतीवरच प्रश्नचिन्ह उपस्थित केले आहे.

आर्णी तालुक्यातील देऊरवाडी येथे शेतकऱ्यांच्या (Farmer) भेटीदरम्यान बच्चू कडू बोलत होते. दुष्काळग्रस्त शेतकऱ्यांना दिवाळीसाठी किमान 10 ते 15 हजार रुपयांची मदत द्यावी, तसेच दुष्काळी अनुदान म्हणून प्रतिहेक्टरी 50 हजार रुपये द्यावेत, अशी मागणी त्यांनी केली.

दुष्काळ आणि नापिकीचा फटका बसल्याने कापूस, सोयाबीन आणि तूर उत्पादक शेतकऱ्यांच्या हातात अपेक्षित उत्पन्न आलेले नाही. त्यातच शेतीचा वाढता उत्पादनखर्च, कर्जाचे हप्ते आणि दैनंदिन घरखर्च यांचा ताळमेळ घालताना शेतकऱ्यांची मोठी दमछाक होत आहे. सणासुदीच्या काळात किराणा, कपडे, मुलांचे शैक्षणिक खर्च आणि कुटुंबाच्या इतर गरजा भागवण्याची जबाबदारीही शेतकऱ्यांवर असते. वाढत्या महागाईत पाच हजार रुपयांच्या मदतीत या सर्व गरजा पूर्ण करणे कठीण असल्याचे बच्चू कडू यांनी अधोरेखित केले.

'हेक्टरी 50 हजार रुपये द्या'

सरकारने केवळ तुटपुंजी मदत देऊन आपली जबाबदारी संपवू नये. दुष्काळाची तीव्रता आणि शेतकऱ्यांचे प्रत्यक्ष नुकसान लक्षात घेऊन मदतीची रक्कम वाढवावी, अशी भूमिका बच्चू कडू यांनी मांडली. दिवाळीसाठी 10 ते 15 हजार रुपयांची मदत देण्याबरोबरच दुष्काळी अनुदान म्हणून प्रतिहेक्टरी 50 हजार रुपये द्यावेत, अशी मागणीही त्यांनी केली. शेतकऱ्यांच्या हातात पुरेसा पैसा दिल्याशिवाय त्यांना आर्थिक संकटातून बाहेर काढणे शक्य होणार नाही, असे त्यांनी स्पष्ट केले.