BJP Vs Bhaskar Jadhav : भाजप लबाड त्यांच्यापासून सावध रहा; भास्कर जाधवांनी उद्धव सैनिकांना केले अलर्ट

Chandrapur News : भाजप आपला जुना लाबड मित्र आहे. त्यांच्यापासून सावध राहा. आता महापालिका निवडणुकीसाठी नव्याने प्रभाग रचना केली जात आहे. ते आपला फायदा आणि सोयीनुसार प्रभागातील मतदारांची कापाकापी करणार आहेत. त्याकडे लक्ष ठेवा, अशी धोक्याची सूचना माजी मंत्री तसेच उद्धव सेनेचे पूर्व विदर्भाचे संपर्क प्रमुख भास्कर जाधव यांनी शिवसैनिकांना दिले.

भास्कर जाधव तीन दिवसांपासून विदर्भाच्या दौऱ्यावर आहेत. आज त्यांनी चंद्रपूर जिल्ह्यातील उद्धव सेनेच्या पदाधिकाऱ्यांची बैठक घेतली. चंद्रपूर महापालिका निवडणुकीच्या तयारीचा आढावा घेतला. यावेळी त्यांनी चार दोन जागा सोडल्या जाणार असतील तर आघाडी करण्याची काही गरज नाही, असेही स्पष्ट सांगून टाकले. आपला पक्ष मोठा आहे. राज्याचे नेतृत्व उद्धव ठाकरे (Uddhav Thackeray) यांनी केले आहे. आजही महाविकास आघाडीत सर्वाधिक आमदार उद्धव सेनेचे असल्याचे त्यांनी सांगितले.

आघाडीतील सर्वच पक्षाच्या नेत्यांनी स्थानिक राजकीय परिस्थिती बघून आघाडी करण्याचे अधिकार स्थानिक नेत्यांना दिले आहेत. मात्र, याचा अर्थ आपल्या सग्यासोयऱ्यांसाठी चार दोन जागा घ्यायच्या आणि त्याला आघाडी झाली असे म्हणता येणार नाही. जागा वाटपात आपला वाटाही तेवढाच महत्त्वाचा असला पाहिजे, अशा स्‍पष्ट सूचना भास्कर जाधव (Bhaskar Jadhav) यांनी दिल्या.

महापालिका निवडणुकीसाठी प्रभाग रचना करण्याची अधिसूचना काढण्यात आली आहे. त्यानुसार नव्याने प्रभाग रचना केली जाणार आहे. त्याचा कार्यक्रमही जाहीर झाला आहे. ही प्रभाग रचना करताना काही मते इकडची तिकडे आणि तिकडची इकडे केली जाणार आहेत. कारण भाजप सध्या सत्तेत आहे. ते किती लबाड आहे हे आम्हाला चांगलेच ठावूक आहे. त्यामुळे आधी प्रभाग रचना कशी केली जाते? यावर बारईकाने लक्ष ठेवा. सोबतच निवडणुकीची तयारी सुरू ठेवा असे भास्कर जाधव यांनी सांगितले.

यावेळी उपस्थित पत्रकारांसोबतही त्यांनी संवाद साधला. चार-दोन जागा घेऊन आम्हाला आघाडी करायची नाही. सन्मानजनक जागा मिळणार असतील तर आम्ही आघाडीसोबत राहू. आघाडीसोबत राहून निवडणूक लढायची की स्वबळावर हा आता प्रश्न नाही. तो जर तरचा प्रश्न आहे, असेही भास्कर जाधव यांनी स्पष्ट केले.