Men voters change parties comment : पुरुषांना आता खूप पार्ट्या, कार्यक्रम होणार; नवनीत राणांचं निवडणुकीत वादग्रस्त विधान

Navneet Rana controversial statement : भाजपचे माजी खासदार नवनीत राणा यांनी निवडणुकीच्या काळातील पार्ट्या अन् त्यातील पुरुषांचा सहभाग, यावर भाष्य केलं आहे.

'नगरपरिषद निवडणुका सुरू आहे. आता खूप पार्ट्या, कार्यक्रम होणार आहे. पुरुष मतदार हा अनेक पार्ट्यांमध्ये जातो, आणि रात्री 2 किंवा 3 वाजता घरी परततो. मात्र या तुलनेत महिला मतदार खूप इमानदार राहतात,' असे नवनीत राणा यांनी म्हटले आहे.

माजी खासदार नवनीत राणा (Navneet Rana) अकोला जिल्ह्यातील अकोट नगरपालिकेच्या भाजप उमेदवाराच्या प्रचारसभेत सहभागी झाल्या होत्या. नवनीत राणा म्हणाल्या, "नगरपरिषद निवडणुका सुरू आहे. आता खूप पार्ट्या, कार्यक्रम होणार आहे. पुरुष मतदार हा अनेक पार्ट्यांमध्ये जातो, आणि रात्री 2 किंवा 3 वाजता घरी परततो. मात्र या तुलनेत महिला मतदार खूप इमानदार राहतो, अन् एकनिष्ठ राहतात. कारण बायका कधीही कुणाच्या पैशाला बळी पडत नाही, आणि कधीही कुणाच्या पार्टीत न जाण्याची त्यांची भूमिका राहते. 'ती' चटणी भाकर खाणार. पण शेवटच्या श्वासापर्यंत घराला घर बनवणार." नवनीत राणांनी असे विधान करून पुरुष मतदारांना आरोपीच्या पिंजऱ्यात उभं केलंय का? अशी चर्चा सुरू झाली आहे.

विधानसभा निवडणुकीत भाजपनं (BJP) राज्यात 'बटेंगे तो कटेंगे'चा नारा दिला होता. यावर विरोधकांनी मोठी टीका करीत रान उठवलं होतं. मात्र, विरोधकांना लोकसभेत मुस्लिम मतांचं मिळालेलं दान समोर ठेवून हा मुद्दा विधानसभेत प्रतिष्ठेचा केला. राज्यात अनेक ठिकाणी भाजपनेही मुस्लिमांना उमेदवारी दिलेली असतांना नवनीत राणांनी, परत अकोटच्या सभेत 'बटेंगे तो कटेंगे'चा नारा दिला आहे.

भाजप नगरपालिका निवडणुकीच्या शेवटच्या टप्प्यात पुन्हा 'बटेंगे तो कटेंगे' मुद्द्याला हवा देण्याचा प्रयत्न यातून करतेय का? असा प्रश्न यातून निर्माण झाला आहे. 'इस बार ना कटना है, ना बटना है','एक रहेना और सेफ भी रहेना है', हे ताकद दाखवतो, आता आपल्यालाही ताकद दाखवण्याची वेळ आल्याचं नवनीत राणा यांनी म्हटले.

राहुल गांधीना आव्हान...

नवनीत राणांनी काँग्रेस नेते राहुल गांधी यांना देखील थेट चॅलेंज दिलं. राहुल गांधींनी संविधानाचं पुस्तक हाती न घेता संविधानातील कलमं सांगून दाखवावी, असं त्या म्हणाल्या. राहुल गांधींनी केलं, तर आपण राजकारण सोडू देऊ, असं आव्हान राणांनी राहुल गांधींना दिलं.

रामजी के साथ मत लढना

राहुल गांधी संविधानाच्या नावाखाली देशाची दिशाभूल करत होते. त्यामुळं माझ्यासारख्या लोकांचा कमी मतांनी पराभव झाला. आता मतचोरी झाल्याचा मुद्दा म्हणता, मग तेव्हा माझ्यासारखे लोक पराभूत कसे झाले? 'किसीसे भी लढना लेकीन रामजी के साथ मत लढना'. मी फक्त छत्रपती शिवाजी महाराज आणि बाबासाहेब आंबेडकरांना मानते. दरम्यान, बाकी कुणाला मी मोजणारी नाही, असे किती आले आणि गेले. किती येतील आणि जातील. जर पाकिस्तानने राम मंदिराकडं बोट दाखवले तर त्यांची बोटं कापून टाकणार, असं विधानही राणा यांनी केलं.