काँग्रेस आमदाराला 'मोदी पॅटर्न'ची भुरळ; आदिवासी गावात साजरी केली दिवाळी

नागपूर : देशाचे पंतप्रधान नरेंद्र मोदी यांनी दरवर्षीप्रमाणे यंदाही दरवर्षी प्रमाणे कारगिलमध्ये जाऊन भारतीय जवानांसोबत दिवाळी साजरी केली. अशीच पद्धत राज्याचे मुख्यमंत्री एकनाथ शिंदे यांनी अनुसरून गडचिरोली येथील जवानांसोबत दिवाळी साजरी करण्याचा निर्णय त्यांनी घेतला.

आता अशाचप्रकारे उमरेडचे काँग्रेस आमदार राजू पारवे यांनीही नागपूर येथील आदिवासी गावात जाऊन दिवाळी साजरी केली आहे. यामुळे त्यांची जोरदार चर्चा होत आहे. (Congress MLA Raju Parve Latest News)

नागपूर जिल्ह्यातील उमरेडचे काँग्रेस आमदार राजू पारवे यांनी नागपूर मधील बिरसा मुंडा कुही फाटा गावात मुक्काम करत काल (ता.24 ऑक्टोबर) आपली दिवाळी साजरी केली. त्यामुळे ते चांगलेच चर्चेत आले. या गावात दोन वेळच्या जेवणासाठी संघर्ष करावा लागतो. मात्र याच गावात आमदार पारवेंनी फटाके फोडत यंदाची दिवाळी जल्लोषात साजरी केली आहे. यावेळी पारवेंनी या गावातील आदिवासींना हक्काचे पट्टे देणार असल्याचेही आश्वासन दिल्याने अदिवाशी बांधवांनी आनंद व्यक्त केला.

दरम्यान, पंतप्रधान नरेंद्र मोदी हे दरवर्षी जवानांसोबत आपली दिवाळी साजरी करतात हीच री ओठत यंदा राज्याचे मुख्यमंत्री शिंदे यांनीही गडचिरोली येथील जवानांसोबत दिवाळी साजरी करण्याचा निर्णय घेतला. या पार्श्वभूमीवर काँग्रेसच्या आमदारांनीही तोच 'मोदी पॅटर्न' वापरत आदिवासी गावात दिवाळी साजरी केल्याने त्यांची अधिक चर्चा होत आहे. तसेच आता मोदी पॅटर्नची भुरळ काँग्रेस आमदारांनाही पडत आहे की काय? असाच प्रश्न अनेकांना पडला आहे.