Eknath Shinde : 'फडणवीस सावजीसारखे तिखट अन् नागपुरी संत्र्यासारखे गोड...', एकनाथ शिंदेंकडून स्तुतिसुमनांची उधळण

Nagpur News, 10 Dec : मागील काही दिवसांपासून मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्यात धुसफूस सुरू असल्याचं पाहायला मिळालं. भाजप आणि शिवसेनेने एकमेकांचे कार्यकर्ते फोडल्यावरून दोन्ही पक्षांमध्ये मोठा वाद उफाळून आला होता.

मात्र, काल नागपूरमधील एका कार्यक्रमात उपमुख्यमंत्री एकनाथ शिंदे यांनी मुख्यमंत्री देवेंद्र फडणवीस यांच्यावर स्तुतीसुमने उधळल्याचं पाहायला मिळालं. 'मुख्यमंत्री देवेंद्र फडणवीस हे सावजीसारखे तिखट आणि नागपुरी संत्र्यासारखे गोड आहेत.

ते चिडचिड न करता अंगावर येणाऱ्या विरोधकांचा करेक्ट कार्यक्रम करतात, असं शिंदे यांनी म्हटलं आहे. त्यांच्या या वक्तव्यामुळे आता दोन्ही नेत्यांमध्ये कोणताही वाद नसल्याच्या चर्चा सुरू झाल्या आहेत.

तर देवेंद्र फडणवीसांकडे हसतखेळत विरोधकांना चीतपट करण्याची क्षमता आहे. टीका, ट्रोलिंग, टेन्शन, टोमणे सहन करण्याची त्यांची क्षमता अफाट आहे. त्यांनी कधीही या टीकेला उत्तर दिले नाही. पण ज्यांना उत्तर द्यायचं असेल त्यांना ते बरोबर उत्तर देतात.

अमिताभ बच्चन हे बॉलीवूडमधील बिग बी असतील तर देवेंद्र फडणवीस सभागृहातील बिग डी आहेत. हा डी म्हणजे डिव्होशन, डेडिकेशन, डेरिंग, डिसिप्लिनचा आणि डिटरमेशनचा आहे. 2022 साली मी जेव्हा आम्ही निर्णायक पाऊल उचलायचं ठरवलं तेव्हा खंबीर पाठिंबा देणारा त्यांच्यातील सच्चा दोस्तही मी पाहिलेला आहे, अशी स्तुतीसुमनं शिंदेंनी फडणवीसांवर उधळली.

यावेळी त्यांनी शिवसेनेतून बंडखोरी करताना फडणवीस मला हुडी घालून भेटायला यायचे या घटनेचा उल्लेख करत, त्यांच्या या हुडीने विरोधकांना हुडहुडी भरली होती, असा टोला लगावला. तर 'मी यारो का यार, दुश्मनो का दुश्मन आहे', हे त्यांनी अनेकदा दाखवलंय, असंही शिंदे यावेळी म्हणाले.

शिंदेंच्या या वक्तव्यामुळे आता आगामी महापालिकेच्या निवडणुकीत दोन्ही पक्ष एकत्रित मैदानात उतरणार अशी शक्यता व्यक्त केली जात आहे. शिवाय स्थानिकच्या निवडणुकीपासून दोन्ही नेत्यांमध्ये सर्व काही अलबेल नाही आणि युती तुटण्याची शक्यता आहे, अशा सर्व चर्चांना शिदेंच्या या भाषणामुळे पुर्णविराम मिळाल्याचं पाहायला मिळत आहे.