Devendra Fadnavis on Mission Nagpur : ‘मिशन नागपूर’साठी देवेंद्र फडणवीसांकडून हालचालींना वेग ; मुंबईत विशेष बैठक!

Devendra Fadnavis and Nagpur District : लोकसभेतील पराभव आणि महायुती सरकारमध्ये वाढत चाललेला असंतोष बघता भाजपा सावध झाली आहे. उपमुख्यमंत्री आणि नागपूर जिल्ह्याचे पालकमंत्री देवेंद्र फडणवीस यांनी रखडलेल्या विविध प्रकल्पासंदर्भात मुंबईत विशेष बैठक बोलावली आहे. ‘मिशन नागपूर’साठी पुन्हा एकदा ते जिल्ह्याकडे लक्ष घालत आहेत.

लोकसभेच्या पराभवाने भाजपाला खडबडून जागे केले आहे. पालकमंत्री असताना फडणवीसांच्या जिल्ह्यातील रामटेकमध्ये महायुतीच्या उमेदवाराचा पराभव झाला. केंद्रीयमंत्री नितीन गडकरी जिंकले असले तरी त्यांचे मताधिक्य निम्म्याने घटले आहे. विधासभा मतदारसंघातही भाजपची टक्केवारी घसरली आहे. ही भाजपसाठी धोक्याची घंटा मानली जाते.

विधानसभेच्या 2014च्या निवडणुकीत भाजपाला सर्वाधिक जागा मिळाल्या होत्या. यात विदर्भाचा सर्वाधिक मोठा वाटा होता. नागपूर शहरातील सर्व सहा जागा भाजपने जिंकल्या होत्या. ग्रामीणमध्ये सहापैकी पाच मतदारसंघात भाजपचे आमदार होते.

देवेंद्र फडणवीस यांच्या गळ्यात मुख्यमंत्री पदाची माळ पडली होती असे असतानाही 2019 च्या निवडणुकीत चित्र बदलले. शहरातील दोन तर ग्रामीणमधील तीन जागा भाजपने गमावल्या. आता लोकसभेच्या निवडणुकीतसुद्धा पूर्व विदर्भात सहा पैकी नागपूरची एकच जागा भाजपला राखता आली.

येत्या चार ते पाच महिन्यात विधानसभेच्या निवडणूक होवू घातली आहे. मतदारांचा रोष भाजपला परवडणारा नाही. फडणवीस यांनाही याचा अंदाज आला आहे. त्यांनी नागपूर जिल्ह्याकडे आपले लक्ष वळवले आहे. जिल्ह्यातील रखडलेले प्रकल्प विधानसभा निवडणुकीपूर्वी मार्गी लावण्याचा प्रयत्न त्यांचा प्रयत्न दिसतो.

तत्पूर्वी केंद्रीयमंत्री नितीन गडकरी यांनीसुद्धा नागपूरमध्ये बैठक घेऊन नागनदीची स्वच्छता व शुद्धीकरण प्रकल्प तसेच ऑरेंज सिटी स्ट्रीट, रस्ते, निर्माणाधीन बाजारपेठ आदी कामांचा आढावा घेतला. यावेळी त्यांनी अधिकाऱ्यांनासुद्धा तंबी देऊन तांत्रिक कारणे पुढे करून कामे रेंगाळ ठेऊ नका अशा सूचना केल्या.

(Edited by - Mayur Ratnaparkhe)