Mahayuti Dispute : मंत्रिमंडळ विस्तारानंतर अनेक आमदार महायुतीतून बाहेर पडणार; नागपूरच्या बड्या नेत्याचा दावा

New Delhi, 18 june : राज्यात मंत्रिपद कमी आणि इच्छुक जास्त अशी परिस्थिती आहे. महायुतीमध्ये आता जी धुसफूस सुरू आहे, ती मंत्रिमंडळ विस्तारानंतर आणखीन वाढल्याचं दिसून येईल. अनेक आमदार त्यांच्या मनासारखा वेगळा निर्णय घेऊ शकतात, असे वक्तव्य काँग्रेसचे आमदार विकास ठाकरे यांनी केले.

आमदार विकास ठाकरे (Vikas Thakre) हे दिल्लीच्या दौऱ्यावर आहेत. दिल्लीत माध्यमांशी बोलताना महायुतीमधील (Mahayuti) धूसफुशीवर विकास ठाकरे यांनी भाष्य केले. ते म्हणाले, लोकसभा निवडणूक (Lok Sabha Election) लढवण्याची माझी तयारी नव्हती. मी केवळ 15 दिवसांत लोकसभेची निवडणूक लढवली आहे, पक्षाने एक वर्ष आधी मला तयारी करायला सांगितलं असतं, तर नागपुरात विजय मिळवून दाखवला असता.

विकास ठाकरे यांनी नागपूरमधून केंद्रीय मंत्री नितीन गडकरी यांच्या विरोधात काँग्रेसकडून लोकसभेची निवडणूक लढवली होती. त्या निवडणुकीत गडकरी यांना 6 लाख 55 हजार 027 तर ठाकरे यांना 5 लाख 17 हजार 424 मते मिळाली आहेत. गडकरी हे 1 लाख 37 हजार 603 मतांचे लीड घेऊन विजयी झाले आहेत.

नागपूर जिल्हा आणि विदर्भात काँग्रेस पक्षाला घवघवीत यश मिळालं आहे. लोकसभेप्रमाणेच विधानसभा निवडणुकीतही विदर्भातून काँग्रेस पक्षाच्या जास्त जागा निवडून येतील, असा विश्वास विकास ठाकरे यांनी व्यक्त केला.

ज्या प्रकारे राज्यातील जनतेने लोकसभा निवडणुकीत भारतीय जनता पक्षाला नाकारलं, त्या पद्धतीने विधानसभा निवडणुकीतही भाजपला जनता नाकारणार आहे. त्यांनी (भाजप, शिवसेना शिंदे गट आणि राष्ट्रवादी काँग्रेस अजित पवार गट NCP) लोकसभा निवडणुकीचीही तयारी केलीच होती. पण, जनतेने त्यांना सपशेल नाकारलं, तोच अनुभव महायुतीला विधानसभा निवडणुकीत येईल, असा दावा आमदार विकास ठाकरे यांनी केला.

विकास ठाकरे म्हणाले, राज्यात आम्ही महाविकास आघाडी म्हणून विधानसभेची निवडणूक लढवणार आहोत. जागावाटपाचा निर्णय आमच्या काँग्रेस पक्षाचे वरिष्ठ नेते बसून घेतील. प्रत्येक पक्ष निवडणुकीची तयारी करत असतो, तशी भाजपदेखील विधानसभेची तयारी करत आहे, त्यासाठीच त्यांची आज दिल्लीत बैठक होत असेल.