मातोश्री'च्या आशीर्वादाने आमदार निवडून आले असते तर पूजा केली असती

भंडारा ः Narendra Bhondekar : शिवसेना नेते आणि मुख्यमंत्री एकनाथ शिंदे (Eknath Shinde) यांनी बंड केल्याने राज्याच्या राजकारणात मोठी उलथापालथ बघायला मिळाली. यामुळे शिवसेना (Shivsena) पक्ष प्रमुख आणि मुख्यमंत्री उद्धव ठाकरे (Uddhav Thackeray) यांना आपल्या मुख्यमंत्री पदाचा राजीनामा द्यावा लागला. यामुळे राज्यातील महाविकास आघाडी सरकार कोसळले. मात्र, बंडखोरी केल्यामुळे शिंदे गट आणि शिवसेना नेत्यांमध्ये आरोप-प्रत्यारोपाच्या फैरी चांगल्याच झडत आहेत.

दरम्यान यामध्ये अपक्ष आमदारांनीही उडी घेतली असून भंडाऱ्याचे अपक्ष आमदार नरेंद्र भोंडेकर (Narendra Bhondekar) यांनी 'मातोश्री'च्या आशिर्वादाने आमदार निवडून आले असते तर सर्वच आमदार निवडुन आले असते, अशी शिवसेनेवर टीका केली तर 'सामना'मधून करण्यात आलेल्या टीकेला प्रत्युत्तर देत शिवसेना नेते आणि खासदार संजय राऊत (Sanjay Raut) यांच्यावरही निशाणा साधला.

अपक्ष आमदार भोंडेकर यांनी शिंदे यांनी बंडखोरी केल्यानंतर त्यांना समर्थन दिले होते. त्यानंतर ते आपल्या मतदारसंघात परतले आहेत. यानंतर त्यांनी प्रसार माध्यमांशी संवाद साधला. राज्यातील या सत्यानाट्यामध्ये जवळजवळ एक महिना गेल्याने आपण जनतेचे काम करू शकलो नाही याची खंत वाटते. मात्र, जिल्ह्यासाठी येणारे प्रोजेक्ट जनतेसाठी आता फायदेशीर ठरणार असल्याचे त्यांनी म्हटले आहे. तसेच राऊतांनी मातोश्री'मुळे बंडखोर आमदार निवडून आल्याच्या वक्तव्यावर त्यांनी तीव्र नाराजी व्यक्त केली. आणि आम्ही जनतेच्या आशीर्वादामुळे निवडून आल्याचे त्यांनी राऊतांना सुनावले.

भोंडेकर म्हणाले, शेवटी काम करणारेच लोक निवडून येत असतात. लोक काम करणाऱ्यांच्याच बाजूने उभे असतात. त्यामुळे ज्यांना आम्हाला निवडून आल्याचे क्रेडीट घ्यायचे असेल त्यांनी ते खुशाल घ्यावे. मात्र जर मातोश्रीच्या आशीर्वादाने आमदार निवडून आले असते तर मातोश्री'ची पूजा करून सर्वच आमदार निवडून आले असते, असा खोचक टोला त्यांनी राऊतांना लगावला.

दरम्यान, त्यांनी आजच्या सामना'च्या संपादकीय लेखाची त्यांनी खिल्ली उडवली. आजच्या संपादकीय लेखामध्ये एकनाथ शिंदेच्या बंडाला स्वातंत्र्याचे बंड न म्हणता खाजगी बंड म्हटले आहे. यावर सामनाला कोण लिहितो हे सर्व जगाला माहीत आहे, असा उपरोधक टोलाही त्यांनी राऊतांना लगावला.