Nagpur Politics : नागपूर महापालिका निवडणुकीचे सर्वाधिक टेन्शन ठाकरेंच्या शिवसेनेला

Nagpur News, 10 May : महापालिका निवडणूक चार महिन्यांच्या आत घेण्याचे आदेश सर्वोच्च न्यायालयाने दिले आहेत. भाजपने स्वबळावर लढण्याची तयारी सुरू केली आहे. राष्ट्रवादी काँग्रेसने 40 जागांवर तर शिंदेंच्या शिवसेनेने नागपूर शहरात 20 जागांवर दावा केला आहे.

सर्वच पक्ष आपापल्या ताकदीनुसार महापालिका निवडणुकीची तयारी करीत असताना सर्वाधिक टेन्शन उद्धव ठाकरेंच्या शिवसेनेला आले आहे. शिवसेनेचे दोन तुकडे झाले आहेत. अर्धे शिवसैनिक उपमुख्यमंत्री एकनाथ शिंदे तर अर्धे उद्धव ठाकरे यांच्यासोबत आहेत.

सध्या उद्धव ठाकरे यांच्याकडे दोनच नगरसेवक आहेत. आजवर भाजपसोबत युती असल्याने शिवसेनेचे नगरसेवक सुमारे पंचेवीस वर्षांपासून नागपूर महापालिकेत प्रतिनिधित्व करीत आहेत. नैसर्गिक मित्र म्हणून भाजपनेही ठाकरेंच्या शिवसेनेला सोबत ठेवले होते.

भाजपच्या नेटवर्कचा फायदाही महापालिकेच्या निवडणुकीत शिवसेनेला होत होता. मात्र, आता परिस्थिती बदलली आहे. ठाकरेंची शिवसेना महाविकास आघाडीत सहभागी झाली आहे. विधानसभेच्या निवडणुकीत काँग्रेसने ठाकरेंच्या शिवसेनेचा दक्षिण नागपूर विधानसभा मतदरासंघही हिरावून घेतला होता.

त्यामुळे शिवसैनिकांमध्ये मोठा असंतोष निर्माण झाला होता. नागपूरचे दोन जिल्हाध्यक्ष प्रमोद मानमोडे आणि किशोर कुमेरिया या दोघांनाही दक्षिण नागपूर विधानसभा मतदारसंघातून निवडणूक लढवायची होती. कुमेरिया यापूर्वी भाजप-सेना युतीचे उमेदवार होते. प्रमोद मानमोडे यांनी दक्षिण नागपूरमधून अपक्ष लढले होते.

मानमोडे शेवटपर्यंत आशेवर होते. शिवसेनेच्या नेत्यांनी त्यांना शब्द दिला होता. मात्र काँग्रेसने ताणून धरले. काँग्रेसचे गिरीश पांडव अवघ्या पाच हजार मतांनी पराभूत झाले होते. त्यामुळे काँग्रेस या मदतरसंघावरचा दावा सोडला नाही. शेवटी ठाकरेंच्या शिवसेनेला माघार घ्यावी लागली.

शिवसेनेचे जिल्हा प्रमुख प्रचारात कुठेच दिसले नाहीत. जिल्हा प्रमुख किशोर कुमेरिया चार वेळा महापालिकेच्या निवडणुकीत जिंकून आले आहेत. ते उपमहापौरसुद्धा होते. त्यांच्या विजयात भाजपचाही वाटा होता. यावेळी उद्धव सेनेला भाजपची साथ मिळणार नाही. दुसरीकडे शिवसेने विरुद्ध काँग्रेसच असाच सामना महापालिकेच्या निवडणुकीत आजवर झाला आहे. त्यामुळे एकट्या पडलेल्या उद्धव सेनेचे टेन्शन चांगलेच वाढले आहे.