Nagpur Violence: नागपुरची दंगल कुणामुळे ? मौलानांनी लिहिलं अमित शहांना पत्र

Nagpur, 21 March 2025: नागपूर कुणी पेटवलं, हिंसाचाराला कारणीभूत कोण आहे, यांचा तपास नागपूरचे पोलिस करीत आहे. अशातच ही दंगल कशामुळे झाली हे सांगत उत्तर प्रदेशात एका मौलानांनी गृहमंत्री अमित शाह यांना पत्र लिहिले आहे. या घटनेला कोण जबाबदार आहे, यांचे कारण सांगत त्यांनी कारवाईची मागणी केली आहे.

'छावा'चित्रपटात औरंगजेब याला हिंदू विरोधी असल्याचे दाखवत हिंदू युवकांना भडकवण्याचे काम करण्यात आले आहे. त्यामुळे 17 मार्च रोजी नागपुरात दंगल झाली. याला 'छावा'चित्रपट जबाबदार आहे, या चित्रपटावर बंदी आणावी, अशी मागणी बरेली येथील मौलाना यांनी केली आहे.

'छावा’चे निर्माते, दिग्दर्शक, लेखक यांच्याविरोधात कायदेशीर कारवाई करावी, अशी मागणी बरेली येथील मौलाना शहाबुद्दीन रिजवी यांनी केली आहे. दोन्ही समाजातील व्यक्तींनी शांती राखावी, असे आवाहन त्यांनी केले आहे.

राज्य अल्पसंख्याक आयोगाच्यावतीने या सर्व घटनेची दखल घेतली आहे. आयोगाचे अध्यक्ष प्यारे खान यांनी पोलिसांसोबत बैठक घेऊन या घटनेची कारणे जाणून घेऊन त्यांनी पडद्यामागचे सूत्रधार शोधण्याचे निर्देश दिले आहे. यावेळी त्यांनी ही दंगल औरंगजेबाच्या कबरीवरून झाली नसल्याचे स्पष्ट केले.

नागपूरच्या सायबर पोलिस विभागाने गुरुवारी नव्याने चार गुन्हे दाखल केले आहेत. यात एकूण ३४ लोकांना आरोपी करण्यात आले आहे. या सर्वांवर दंगलीस चिथावणी देणे, साहित्य गोळा करणे, लोकांना भडकावणे तसेच सोशल मीडियाचा वापर करून दंगलीच प्रोत्साहित करण्याच्या कलमा दाखल केल्या आहेत.

विश्व हिंदू परिषद आणि बजरंग दलाच्यावतीने औरंगजेबाची कबर हटवण्यासाठी आंदोलन करण्यात आले होते. त्यानंतर काही समाजकंटकांनी त्याला विरोध दर्शवण्यासाठी तुफान दगडफेक केल्याचे बोलले जाते. त्यामुळे नागपूरमध्ये दंगलसदृष्य परिस्थिती निर्माण झाली होती. तीन दिवसांपासून नागपूरमध्ये तणावाची परिस्थिती आहे.