Anil Deshmukh News : देशमुखांच्या निमित्ताने भाजपच्या बालेकिल्ल्यात राष्ट्रवादीचे शक्ती प्रदर्शन

NCP News : राष्ट्रवादीचे नेते अनिल देशमुख यांना सीबीआय आणि ईडीच्या प्रकरणातून जामीन मिळाल्यानंतर ते आज पहिल्यांदाच नागपूरमध्ये आले. यावेळी राष्ट्रवादी काँग्रेसच्या कार्यकर्त्यांनी त्यांचे जंगी स्वागत केले. तसेच नागपूर विमानतळावर त्यांच्या कार्यकर्त्यांनी शक्ती प्रदर्शन केले. राष्ट्रवादीच्या कार्यकर्त्यांनी देशमुखांचे केलेले स्वागत पाहून देशमुखही भारावले.

भाजपच्या बालेकिल्ल्यात राष्ट्रवादीने शक्ती प्रदर्शन केल्याने राजकीय वर्तुळात वेगवेगळी चर्चा सुरू झाली आहे. नागपूर हा भाजपचा बालेकिल्ला म्हणून ओळखला जातो. भाजपचे केंद्रीय मंत्री नितीन गडकरी आणि उपमुख्यमंत्री देवेंद्र फडणवीस हे नागपूरचे आहेत. त्यामुळे नागपूरमध्ये भाजप वरचढ आहे. मात्र, आगामी निवडणुका पाहता राष्ट्रवादीने शक्ती प्रदर्शन केल्याने अनेकांच्या भुवया उंचावल्या आहेत.

अनिल देशमुख हे त्यांच्या होम ग्राऊंडवर तब्बल २१ महिन्यांनी आले. त्यामुळे आगामी निवडणुकांच्या पार्श्वभूमीवर राष्ट्रवादी नागपूरमध्ये लक्ष घालण्याची शक्यता आहे. यातच आता अनिल देशमुखही विदर्भ आणि नागपूर जिल्ह्यात पक्षाची ताकद वाढण्यासाठी पुन्हा एकदा सक्रिय होऊ शकतात. असेच काहीसे उदाहरण आजच्या शक्ती प्रदर्शनाच्या माध्यमातून दिसले.

अनिल देशमुख यांच्यावर भ्रष्टाचाराचे आरोप झाले होते. त्यानंतर त्यांना ईडी आणि सीबीआयकडून अटक करण्यात आली होती. त्यानंतर त्यांना तब्बल 14 महिन्यानंतर जामीन मिळाला. मात्र, मुंबईतून तीन महिने बाहेर जाता येणार नाही अशी अट न्यायालयाने ठेवली होती. त्यानंतर देशमुखांनी मुंबई बाहेर जाण्याची परवानगी न्यायालयाकडे मागितली होती. न्यायालयाने परवानगी दिल्यानंतर ते आज नागपूरला आपल्या मतदारसंघात दाखल झाले.

यावेळी राष्ट्रवादीच्या कार्यकर्त्यांनी नागपुरात 'टायगर इज बॅक'चे पोस्टर झळकवले. यावेळी माध्यमांशी बोलताना देशमुख म्हणाले, ''21 महिन्यानंतर मी नागपुरात आलो आहे. त्यामुळे मला नागपुरात येऊन आनंद झाला आहे.

मला खोट्या गुन्ह्यामध्ये आत टाकण्यात आले होते. पण आता स्वगृही परतल्यामुळे आनंद झाला आहे'', असं म्हणत देशमुख भावूक झाल्याचे पाहायला मिळाले. दरम्यान, 21 महिन्यांनी अनिल देशमुख हे आपल्या मतदारसंघात दाखल झाल्यामुळे राष्ट्रवादीच्या कार्यकर्त्यांना बळ मिळणार आहे.