BJP On Manoj Jarange: फडणवीसांवरची टीका झोंबली,भाजप नेत्यानं जरांगेंना फटकारलं; म्हणाले,'आज शिवराय हयात असते, तर...

Nagpur News : मनोज जरांगे यांनी पुन्हा मराठा आरक्षणाचे हत्यार उपसले आहे. यावेळी ते जरा जास्तच आक्रमक झाले आहेत. त्यांनी थेट मुख्यमंत्री व त्यांच्या कुटुंबीयांवर खालच्या पातळीवर जाऊन टीका केल्याने भाजपचे नेते चांगलेच चिडले आहेत. त्यामुळे आमदार व ओबीसी नेते परिणय फुके(Parinay Fuke) यांनी आपल्या बाह्या पुन्हा खोचल्या असून जरांगे आपली जीभ आवरावी, असा सल्ला देऊन त्यांना शेवटचा अल्टिमेटम दिला आहे. हे बघता स्थानिक स्वराज्य संस्थांच्या निवडणुकीत आरक्षण हाच मुद्दा तापणार असून आरोप-प्रत्यारोपांची धार आणखी वाढणार असल्याचे दिसून येते.

मराठा समाजाला ओबीसी समाजाच्या सामावून घ्यावे आणि आरक्षण द्यावे याकरिता मनोज जरांगे यांनी पुन्हा आंदोलनाचा इशारा दिला आहे. यापुन्हा महायुतीमध्ये मोठी अस्वस्थता निर्माण झाली आहे. जरांगे यांनी मुख्यमंत्री देवेंद्र फडणवीस यांना टार्गेट केले असल्याचे दिसून येते. त्यांचा सर्व राग फडणवीस यांच्यावर असल्याने आंदोलनामागे कोणाची तरी फूस असल्याची चर्चा सुरू आहे.

यातच मनोज जरांगे पाटील (Manoj Jarange Patil) यांनी मुख्यमंत्र्यांसोबत त्यांच्या कुटुंबीयांवरसुद्धा टीकाटीपणी सुरू केली आहे. याचा समाचार आमदार परिणय फुके यांनी आज घेतला. ज्या छत्रपती शिवाजी महाराजांचे नाव घेऊन जरांगे आंदोलन करत आहेत.

आता छत्रपती हयात असते तर कोणाच्याही आई बहिणीवर टीका करणाऱ्यांची त्यांनी आधी जीभ छाटली असती. जरांगे यांनी आपली लिमिट क्रॉस केली आहे. यानंतरही ते असेच बोलत राहिल्यास त्यांना त्यांच्याच भाषेत उत्तर दिले जाईल. हा आमचा त्यांना शेवटचा अल्टिमेटम असल्याचा इशाराही परिणय फुके यांनी दिला.

मनोज जरांगे पाटील यांनी यापूर्वी लोकसभा आणि विधानसभा निवडणुकीच्या वेळी आंदोलन केले होते.आता महापालिका आणि जिल्हा परिषदेच्या निवडणूक होणार असल्याने जरांगे पुन्हा सक्रिय झाले आहेत. निवडणुकीचे निमित्त साधून ते मराठा आरक्षणावरून ते भाजपला कोंडीत पकडण्याचा प्रयत्न करीत असल्याचे बोलले जात आहे.

विरोधकांची ही राजकीय खेळी असल्याचे मानल्या जात आहे. जिल्हा परिषद आणि महापालिकेच्या निवडणुकीत सर्वोच्च न्यायालयाने ओबीसीचे 27 टक्के आरक्षण कायम ठेवले आहे.