Shiv Sena Leader : मोठी बातमी! जागा वाटपाची खलबतं सुरू असतानाच शिवसेनेच्या बड्या नेत्याची प्रकृती अचानक बिघडली

अमरावती महानगरपालिकेच्या आगामी निवडणुकांच्या पार्श्वभूमीवर सुरू असलेल्या राजकीय हालचालींमध्ये एक महत्त्वाची घटना घडली आहे. जागावाटपाच्या चर्चेदरम्यान शिवसेनेचे ज्येष्ठ नेते आनंदराव अडसूळ यांना अचानक अस्वस्थ वाटू लागले.

बैठकीदरम्यान त्यांची प्रकृती बिघडल्याने उपस्थितांमध्ये एकच खळबळ उडाली. तातडीने त्यांना अमरावती शहरातील एका खासगी रुग्णालयात दाखल करण्यात आले. सध्या त्यांची प्रकृती स्थिर असून उपचार सुरू असल्याची माहिती डॉक्टरांनी दिली आहे.

राज्यातील सर्व महानगरपालिकांच्या निवडणुकांचे वेळापत्रक नुकतेच जाहीर झाले आहे. त्यामुळे प्रत्येक पक्षाने तयारीला वेग दिला असून युती आणि आघाडीच्या बैठका जोरात सुरू आहेत. अमरावती महानगरपालिकेसाठी 15 जानेवारी रोजी मतदान होणार आहे. या निवडणुकीसाठी शिवसेना आणि भाजप यांच्यात जागावाटपाबाबत चर्चा सुरू असतानाच हा प्रकार घडला. आनंदराव अडसूळ यांची तब्येत अचानक बिघडल्याने चर्चांना काही काळासाठी विराम मिळाला.

अडसूळ यांना रुग्णालयात दाखल केल्याची माहिती मिळताच भाजपचे आमदार संजय कुटे तातडीने रुग्णालयात पोहोचले. त्यांनी अडसूळ यांची भेट घेऊन प्रकृतीची विचारपूस केली. यावेळी माजी आमदार अभिजीत अडसूळ आणि संजय कुटे यांच्यात निवडणुकीच्या अनुषंगाने चर्चा झाल्याची माहिती समोर आली आहे. यापूर्वी शिवसेनेने भाजपसमोर काही जागांचा प्रस्ताव ठेवला होता, मात्र तो प्रस्ताव भाजपने मान्य केला नव्हता. त्यानंतर आता पुन्हा एकदा दोन्ही पक्षांमध्ये चर्चा सुरू झाल्याने राजकीय घडामोडींना नवे वळण मिळाले आहे.

दरम्यान, रुग्णालयात आमदार रवि राणा यांनीही आनंदराव अडसूळ यांची भेट घेऊन तब्येतीची विचारपूस केली. एकीकडे अडसूळ यांच्या प्रकृतीकडे सर्वांचे लक्ष लागले असताना, दुसरीकडे अमरावती महापालिकेच्या निवडणुकीतील जागावाटपाच्या चर्चांकडे संपूर्ण राज्याचे लक्ष केंद्रित झाले आहे.