NCP Vs Congress: नागपूर जिल्ह्यात शरद पवारांच्या राष्ट्रवादीनं सोडला काँग्रेसचा नाद, स्थानिकच्या निवडणुकीसाठी मोठा प्लॅन सुरू

Nagpur News: स्थानिक स्वराज्य संस्थेमध्ये महायुती आणि महाविकास आघाडीचे काही खरे दिसत नाही. भाजप आणि काँग्रेस आपल्या मित्रपक्षांसोबत बोलणी करण्यास तयार नाही. प्रतिसादसुद्धा दिला जात नाही. नागपूर जिल्ह्यात सध्या हेच चित्र आहे. हे बघून शरद पवार यांची राष्ट्रवादी काँग्रेसने (NCP) काँग्रेसचा नाद सोडून दिला आहे. उद्धव ठाकरे शिवसेना, आम आदमी पार्टी, बच्चू कडू यांनी प्रहार संघटना, रिपाईच्या काही घटक पक्षांसोबत त्यांनी बोलणी करून निवडणुकीची तयारी सुरू केली आहे.

राष्ट्रवादी काँग्रेसने यापूर्वीसुद्धा काँग्रेस प्रतिसाद देत नाही, बोलणी करण्यास पुढे येत नाही असे सांगून वेळी आघाडी करणार असल्याचे जाहीर केले होते. त्यानंतरही काँग्रेसकडून कोणी पुढाकार घेतला नाही. याउलट काँग्रेसने इच्छुकांकडून उमेदवारी अर्ज घेऊन, इच्छुकांच्या मुलाखती घेतल्याने चर्चेची दारे बंद केली असल्याचे स्पष्टपणे दिसून येते.

काँग्रेसचे (Congress) इरादे लक्षात घेऊन पवारांच्या राष्ट्रवादी काँग्रेसने आपल्या हालचाली वाढवल्या आहेत. समविचारी पक्षांसोबत बोलणीची पहिली फेरी आटोपली आहे. उद्धव ठाकरे सेना आणि आम आदमी पार्टीने प्रतिसाद दिला असल्याचा दावा केला जात आहे. या संदर्भात नगर परिषद व नगर पंचायत निवडणुकीच्या दृष्टिकोनातून राष्ट्रवादी काँग्रेस पार्टी शरदचंद्र पवार पक्षाच्यावतीने जिल्ह्यात तालुका पातळीवर बैठका घेऊन आढावा घेण्यात आला.

जिल्ह्यातील सर्व तालुक्यांमध्ये जाऊन इच्छुक उमेदवारांच्या मुलाखती घेऊन पदाधिकारी व कार्यकर्त्यांशी चर्चा केली. समविचारी पक्षांना सोबत घेऊन आपण निवडणुकीला सामोरे जावे' अशी सूचना सर्वच तालुक्यातून आली असल्याचे जिल्हाध्यक्ष प्रवीण कुंटे पाटील यांनी कळविले आहे.

उद्धव बाळासाहेब ठाकरे, आम आदमी पार्टी, प्रहार संघटना, रिपब्लिकनचे विविध गट, बिरसा ब्रिगेड यांच्यासह इतर समविचारी पक्षांसोबत चर्चा झाली आहे. इतरही काही पक्षांनी सोबत येण्याची इच्छा व्यक्त केली असून त्यांनाही सोबत घेण्यात येणार आहे.

भाजपला रोखण्यासाठी आम्ही पूर्ण तयारी केली आहे. त्या दृष्टिकोनातून जिल्ह्यातील सर्वच तालुक्यात जाऊन लहान-मोठ्या संघटनांशी बोलणी करण्यात आली. काही जागांसंदर्भात चर्चा झाली असून, हिंगणा विधानसभा क्षेत्राची जबाबदारी माजी मंत्री रमेश बंग व माजी आमदार विजय घोडमारे तसेच काटोल विधानसभा क्षेत्राची जबाबदारी दीपक मोहिते व चंद्रशेखर कोल्हे यांना देण्यात आली आहे.

काही ठिकाणी अडचणी असतील तर त्याचा निर्णय घेण्याचे सर्व अधिकार हे राष्ट्रवादी काँग्रेस पार्टी शरदचंद्र पवार पक्षाचे अध्यक्ष व प्रमुख पदाधिकाऱ्यांना देण्यात आल्याचे कुंटे पाटील यांनी सांगितले.