Shivraj More and Youth Congress : युवक काँग्रेसच्या तब्बल ६० पदाधिकाऱ्यांना पदमुक्त करण्याचा आदेश ताजा असतानाच आता युवक काँग्रेसच्या प्रदेश कार्यकारी अध्यक्षपदी शिवराज मोरे यांची नियुक्ती करण्यात आली आहे. युवक काँग्रेसचे प्रदेशाध्यक्ष कुणाल राऊत यांना हा धक्का मानला जात आहे. त्यांच्याच सांगण्यावरून पाच डझन पदाधिकाऱ्यांना पदमुक्त करण्यात आल्याचा आरोप त्यांच्यावर आहे.
युवक काँग्रेसच्यावतीने सरसंघचालक मोहन भागवत(Mohan Bhagwat) यांच्या विरोधात महाल येथील संघमुख्यलयासमोर आंदोलन केले होते. या आंदोलनाला दांडी मारणाऱ्या ६० पदाधिकाऱ्यांना तडकाफडी पदमुक्त करण्याचे आदेश युवक काँग्रेसचे राष्ट्रीय अध्यक्षांनी काढले होते. हा निर्णय प्रदेशाध्यक्ष कुणाल राऊत यांच्या सांगण्यवरून घेण्यात आल्याचा पदमुक्त पदाधिकाऱ्यांचा आरोप आहे. आंदोलनाची तारीख आणि वेळ दोन वेळा बदलण्यात आली. त्याची माहिती पदाधिकाऱ्यांना देण्यात आली नाही. वेळेवर सूचना देण्यात आली होती. त्यामुळे अनेकांनी मेसेज बघितला नाही आणि काही नागपूरमध्ये नव्हते असे त्यांचे म्हणणे आहे.
पदमुक्त करण्यात आलेल्यांमध्ये शहर काँग्रेसचे अध्यक्ष आमदार विकास ठाकरे यांचे चिरंजीव केतन ठाकरे, माजी विरोधीपक्षनेते विजय वडेट्टीवार(Vijay Wadettiwar) यांच्या कन्या शिवानी वडेट्टीवार यांच्यासह अनेकांचा समावेश आहे. युवक काँग्रेसचा मागील कार्यकाळ संपला आहे. नव्याने निवडणुकीचा कार्यक्रम जाहीर केला जाणार आहे. शिवानी वडेट्टीवार, केतन ठाकरे यांच्यासह काही इच्छुक अध्यक्षपदाची निवडणूक लढण्याची शक्यता आहे. त्यांना निष्क्रिय ठरवण्यासाठी हा खटाटोप केल्याचा आरोप राऊत यांच्यावर केला जात आहे.
काँग्रेस(Congress) राष्ट्रीय पक्ष आहे. कुठलाही महत्त्वाचा निर्णय घेण्यासाठी काही नियमावरीली पक्षाने तयार केली आहे. कारवाई व पदमुक्त करायचे असले तर संबंधिताला नोटीस बजावून त्याचे म्हणणे ऐकूण घ्यावे लागते. मात्र कुणाल राऊत यांनी सर्व नियमावली डावलून हुकूमशाही पद्धतीने युवक काँग्रेसचे उपाध्यक्ष, सरचिटणीस, चिटणीस यासह विविध पदाधिकाऱ्यांना पदमुक्त केले. कुणाल राऊत पक्षशिस्त न पाळता, स्वमालकीची प्रॉपर्टी असल्याप्रमाणे संघटना चालवत असल्याच्या अनेक तक्रारी यापूर्वी देखील दिल्लीत पोहचल्या होत्या.
त्यांनी अध्यक्ष म्हणून कुठलीही जबाबदारी पार पाडली नाही, सक्रिय पदाधिकाऱ्यांना सूडबुद्धीने पदमुक्त केल्याच्या त्यांच्या विरोधात तक्रारी करण्यात आल्या होत्या. त्यावर राऊत यांनाच पदमुक्तीच्या आदेशावर कार्य अहवाल सादर करायला सांगितला होता. आता शिवराज मोरे यांची कार्यकारी अध्यक्षपदी नियुक्ती करून राऊतांचे पंख छाटल्याचे बोलले जात आहे. कार्यकारी अध्यक्ष म्हणून नेमणूक झालेले शिवराज मोरे यांना आजच दिल्लीत बोलावून तातडीने पदभार स्वीकारण्याचा आदेश वरिष्ठांनी दिला आहे. कुणाल राऊत हे माजी मंत्री व उत्तर नागपूरचे आमदार नितीन राऊत(( Nitin Raut)) यांचे चिरंजीव आहेत.
(Edited by - Mayur Ratnaparkhe)
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.