Maharashtra Cabinet : विधानसभा अध्यक्षपद अन्‌ मंत्रिमंडळ फेरबदलबाबत मुनगंटीवार स्पष्टच बोलले; म्हणाले, ‘सध्यातरी शक्य...’

Nagpur, 25 July : राज्याच्या मंत्रिमंडळात फेरबदल होणार असल्याची चर्चा आज सकाळपासून सुरू आहे. तसेच, विधानसभा अध्यक्ष ॲड राहुल नार्वेकर मंत्री होणार आणि त्यांच्या जागी भाजपचे वरिष्ठ आमदार सुधीर मनगुंटीवार हे विधानसभा अध्यक्ष होणार, अशी चर्चा सुरू आहे. त्यावर आमदार मुनगंटीवार यांनी आपल्या स्वभावाप्रमाणे सडतोड शब्दांत प्रतिक्रिया देताना, सध्या तरी ते शक्य नाही, असे स्पष्टपणे सांगितले आहे.

मुख्यमंत्री देवेंद्र फडणवीस (Devendra Fadnavis) हे कालपासून दिल्ली दौऱ्यावर आहेत. फडणवीस यांनी गुरुवारी जेएनयू विद्यापीठातील कार्यक्रमाला हजेरी लावल्यानंतर ते आज भाजप नेत्यांच्या गाठीभेटी घेत आहेत. केंद्रीय गृहमंत्री अमित शाह, यांच्यासोबत ते विविध केंद्रीय मंत्री आणि भाजप नेत्यांना भेटत आहेत. विशेषतः अमित शाह यांच्या भेटीमुळे राज्याच्या मंत्रिमंडळात फेरबदल होणार, अशी चर्चा रंगली आहे.

दुसरीकडे राज्याच्या मंत्रिमंडळातील राष्ट्रवादी काँग्रेस माणिकराव कोकाटे, शिवसेनेचे संजय शिरसाट, गृहराज्यमंत्री योगेश कदम, कायम वाद्‌ग्रस्त विधाने करणारे नीतेश राणे यांच्या नावाचा समावेश आहे. तसेच, विधानसभा अध्यक्ष ॲड. राहुल नार्वेकर यांच्या गळ्यात मंत्रिपदाची माळ पडणार असून सुधीर मुनगंटीवार (Sudhir Mungantiwar) हे विधानसभेचे अध्यक्ष होतील, असे सांगितले जात आहे.

त्या पार्श्वभूमीवर भाजपचे वरिष्ठ आमदार सुधीर मुनगंटीवार यांनी मंत्रिमंडळ फेरबदलाबाबत सडेतोडपणे आपल्या भावना मांडल्या. ते म्हणाले, राज्याच्या मंत्रिमंडळातील फेरबदलाबाबत मला कोणतीही माहिती नाही. त्याबाबतची कोणतीही चर्चा कोअर टीममध्ये किंवा कोअर टीमची कोणतीही तातडीची बैठक लावण्यात आलेली नाही.

साधारणपणे मंत्रिमंडळाबाबतचा कोणताही निर्णय केंद्रीय स्तरावर होत असतो. राज्य स्तरावरील नेत्याला यासंदर्भातील कोणतीही माहिती अगोदर प्राप्त होत नाही. मंत्रिमंडळातील फेरबदलाची निर्णय ज्या क्षणी होईल, त्याच क्षणी तो आपल्यापर्यंत पोचत असतो. पण, गेली अनेक वर्षे राजकीय क्षेत्रात असल्यामुळे सध्या तरी असं काही होईल, असं मला वाटत नाही. सध्या तरी ते शक्य नाही, असे मुनगंटीवार यांनी सांगितले.

ते म्हणाले, आता सध्या मंत्रिमंडळात कोणतेही फेरबदल होण्याची शक्यता नाही, असे माझे व्यक्तिगत मत आहे. आगामी काळात महापलिका, नगरपालिका, पंचायत समित्या, जिल्हा परिषदेच्या निवडणुका आहेत. त्या पार्श्वभूमीवर त्या त्या जिल्ह्यातील मंत्रिपदावर असणाऱ्या नेत्याला अस्थिर करण्याचे काम होईल, असे मला वाटत नाही.