Nagpur ZP reservation : दिग्गज नेते, माजी मंत्र्याच्या पुत्रांची अडचण; झेडपी आरक्षणाने इच्छुकांचा हिरमोड

Nagpur News : नागपूर जिल्हा परिषद सर्कल आरक्षणाची सोडत सोमवारी काढण्यात आली. महिला व अनुसूचित जाती जमातीच्या आरक्षणामुळे जिल्हा परिषदेचा माजी उपाध्यक्ष मनोहर कुंभारे, माजी मंत्री यांचे पुत्र दिनशे बंग, माजी सभापती सतीश शिंदे, काँग्रेस माजी जिल्हाध्यक्ष व गटनेते बाबा आष्टणकर यांना मोठा फटका बसला आहे. त्यामुळे अनेकांचा हिरमोड झाला असून आरक्षणाची सोडत मॅनेज केल्याची शंका व्यक्त केली जात आहे.

राष्ट्रवादी काँग्रेसचे नेते (NCP) व माजी मंत्री रमेश बंग यांचे सुपुत्र हिंगणा तालुक्यातील रायपूर सर्कलमधून प्रथमच निवडून आले होते. मात्र आता त्यांचे सर्कल महिलेसाठी राखीव झाले आहे. 20 वर्षांपूर्वी याच सर्कलमधून काँग्रेसचे माजी जिल्हाध्यक्ष बाबा आष्टणकर हे निवडून आले होते. त्यावेळी ते काँग्रेस सत्तापक्षनेते होते. आरक्षणामुळेच त्यांना पंधरा वर्ष लढता आले नाही. यावेळी ते पुन्हा लढण्याच्या तयारीत होते. मात्र, त्यांचाही पत्ता आता कट झाला आहे.

या सर्कलमधून उज्ज्वला बोढारे या निवडून आल्या होत्या. त्यावेळी हे सर्कल महिलांसाठी राखीव होते. गेल्या निवडणुकीत त्या कान्होलीबारा सकर्लमधून राष्ट्रवादी काँग्रेसच्या तिकिटावर निवडून आल्या होत्या. अडीच वर्ष सभापती होत्या. दोन महिन्यांपूर्वी त्यांनी भाजपमध्ये (BJP) थाटात प्रवेश केला. भाजपच्या संभाव्य जिल्हा परिषद अध्यक्ष म्हणून त्यांच्याकडे बघितल्या जात होते. मात्र त्यांचे कान्होलीबारा सर्कल अनुसूचित जमातीच्या महिलेसाठी आरक्षित झाले आहे.

काटोल-नरखेड विधानसभा मतदारसंघाअंतर्गत येणारे सावरगाव सर्कल हे सर्वसाधारण महिलेसाठी राखीव झाले आहे. या मतदारसंघाचे प्रतिनिधित्व माजी आमदार सुनील शिंदे यांचे सुपुत्र सतीश शिंदे यांनी केले आहे. ते सध्या राष्ट्रवादी काँग्रेसमध्ये आहेत. पंधरा वर्षांपासून आरक्षणामुळे त्यांची अडचण होती. यावेळी सर्कल खुले झाले मात्र महिलेसाठी राखीव झाले आहेत. त्यामुळे जिल्ह्य परिषदेच्या राजकारणात पुन्हा सक्रिय होण्याचे त्यांचे इरादे संपुष्टात आले आहेत. विशेष म्हणजे सावरगाव हे शिंदे यांचे सर्कल म्हणून ओळखले जाते.

जिल्हा परिषदेचे माजी उपाध्यक्ष मनोहर कुंभारे यांच्यावर पुन्हा राखीव बाकावर बसण्याची वेळ आली आहे. त्यांचे तेलकामठी सर्कल ओबीसी महिलेसाठी राखीव झाले आहे. असे असले तरी आपल्याच घरी सत्ता राखण्यास त्यांना मदत झाली आहे. या सर्कलमधून मागील निवडणुकीत त्यांच्या पत्नी निवडून आल्या होत्या. त्यासुद्धा उपाध्यक्ष होत्या. मात्र यावेळी मनोहर कुंभारे यांनी निवडणूक लढण्याची तयारी केली होती. त्यांच्या मतदारसंघाच्या शेजारी असलेले केळवद हे सर्कल देखील ओबीसी महिलेसाठी राखीव झाले आहेत. या सर्कलमधून जिल्हा परिषदेचे माजी उपाध्यक्ष नितीन राठी हेसुद्धा निवडणूक लढण्यास इच्छुक होते.

काँग्रेस नेते सुनील केदारांनी त्यांनी लढण्यासाठी बळ देण्याचा शब्द दिला होता. विशेष म्हणजे मनोहर कुंभारे काँग्रेसचे नेते सुनील केदारांचे कट्टर समर्थक होते. लोकसभेच्या निवडणुकीत ते अचानक भाजपमध्ये दाखल झाले. त्यांना भाजपचे लगेच जिल्हाध्यक्ष केले आहे. मात्र आरक्षणामुळे त्यांना लढता येणार नाही.