Narendra Modi News: विदर्भातील नेत्यांना मोदींनी विचारला जाब; नागपूरमध्ये मतदान कमी का?

Nagpur News: नागपूर आणि रामटेक लोकसभा मतदारसंघात (Nagpur Lok Sabha 2024) ७५ टक्के मतदान होऊ शकले नाही. रामटेकच्या तुलनेत नागपुरमध्ये कमी मतदान झाले, याबाबत पंतप्रधान नरेंद्र मोदी यांनी विदर्भातील नेत्यांना जाब विचारला आहे.

प्रशासनाचा निरुत्साह, वाढते तापमान आदी कारणे सांगून या नेत्यांनी मोदींच्या प्रश्नांतून आपली सुटका करुन घेतली. पंतप्रधान मोदींना जेव्हा पदाधिकाऱ्यांना भेटले तेव्हा त्यांनी नागपूरमध्ये मतदानाचा टक्का कमी का, असा प्रश्न विचारला. तापमान ४१ अंश सेल्सिअस होते. प्रचंड ऊन व उकाड्यामुळे बरेच मतदार घराबाहेर पडले नाहीत, असे पदाधिकाऱ्यांनी मोदींना सांगितले.

"मतदार याद्यांमध्ये प्रचंड घोळ होता.हजारो मतदारांची नावे गहाळ झालीअनेक मतदान केंद्रांवर रांगा होत्या.संथ गतीने मतदान होत असल्याने अनेकजण मतदान न करताच निघून गेले,,असे उत्तर पदाधिकाऱ्यांनी दिले. भेट घेणाऱ्यांमध्ये भाजपचे प्रदेश उपाध्यक्ष संजय भेंडे, माजी महापौर संदीप जोशी, शहर अध्यक्ष बंटी कुकडे, जिल्हाध्यक्ष सुधाकर कोहळे यांचा समावेश होता.

नागपूरमध्ये शुक्रवारी पंतप्रधान मोदी रात्री मुक्कामाला होते. वर्धा लोकसभा मतदासंघात प्रचार सभा घेण्यासाठी ते जबलपूर येथून विदर्भात आले होते. रात्रभर राजभवनवर त्यांनी मुक्काम केला. काल (ता.२०) सकाळी साडेनऊ वाजताच्या सुमारास ते नांदेडकडे रवाना झाले.पदाधिकाऱ्यांनी नागपूर विमानतळावर मोदींची भेट घेतली.

केंद्रीय मंत्री नितीन गडकरी हे नागपूर लोकसभा लढत आहे.त्या ठिकाणी फक्त ५४ टक्के मतदान झाले. भाजप आणि प्रशासनाने ७५ मतदानाचे उद्दिष्ट ठेवले होते. पण नेहमी प्रमाणेच सरासरी मतदान झाले. मतदान जागृतीसाठी प्रशासनाने मोहीम राबवली होती. पण त्यांचा फारसा फायदा झाला नाही. मतदानात वाढ झाली नाही. मतदान केल्यानंतर सकाळी नितीन गडकरी यांनी ७५ टक्के मतदान होईल, असे सांगत आपण पाच लाखांच्या मताधिक्याने निवडून येणार असल्याचा दावा केला आहे.