BJP internal conflict news: बावनकुळे-सुलेखा कुंभारे यांच्यातील वाद कशामुळे? भाजपमध्ये उलटसुलट चर्चा

Nagpur News : कामठी नगर पालिकेच्या मतदानापासून नागपूरमध्ये एक व्हीडीओ चांगलाच गाजत आहे. बहुजन रिपब्लिकन एकता मंचच्या संस्थापक अध्यक्ष, माजी राज्यमंत्री व कामठीच्या माजी आमदार ॲड. सुलेखा कुंभारे यांचा हा व्हीडीओ असून त्या पालकमंत्री चंद्रशेखर बावनकुळे यांना व्हिडिओतून शिव्याशाप देताना दिसत आहे. कालपर्यंत बावनकुळे आणि कुंभारे यांचे अतिशय चांगले होते. त्या जाहीरपणे पालकमंत्र्यांची प्रशंसा करायच्या आणि त्यांनी केलेल्या विकास कामांचे दाखले द्यायच्या. नगराध्यक्षपदाच्या उमेदवारीवरून दोघांचे फाटले असे सांगण्यात येते. मात्र एका जागेसाठी एवढे टोकाचे संबंध बिघडले यावर कोणाचा विश्वास बसत नाही.

कुंभारे यांनी बावनकुळे यांच्यासाठी कामठी विधानसभा मतदारसंघाचा दरवाजा बंद करू असा इशारा दिला आहे. यावरून भाजपातील (Bjp) दोन बड्या नेत्यांच्या सुप्त संघर्षातून हा वाद निर्माण झाला असल्याचे अंदाज बांधला जात आहे.केंद्रीयमंत्री नितीन गडकरी आणि सुलेखा कुंभारे यांचे अतिशय सलोख्याचे संबंध आहेत. वीस वर्षांपूर्वी काँग्रेसच्या कार्यकाळात सुलेखा कुंभारे या पाणी पुरवठा विभागाच्या राज्यमंत्री होत्या.

बावनकुळे जिल्हा परिषदेचे सदस्य असताना गडकरी त्यांना कामठीतून कुंभारे यांच्या विरोधात उमेदवारी दिली होती. त्यावेळी ही मॅचफिक्सिंग असल्याचे बोलले जात होते. मात्र निकाल उलट लागला. बावनकुळे जिंकले आणि कुंभारे पराभूत झाल्या. त्यानंतर बावनकुळे यांनी संपूर्ण मतदारसंघावर आपली कमांड निर्माण केली. कुंभारे यांनाही जमेल तेवढी मदत केली. त्यांचे ड्रॅगन टेंपल उभारण्यासाठी मोठे साहाय्य केले. कुंभारे यांनी राजकीय निवृत्तीची घोषणाही केली

पंधरा वर्षांपासून कामठीचे नगरपालिकेचे सर्व निर्णय बावनकुळे आणि कुंभारे दोघे मिळूनच घेत होते. यावेळी नगरपालिकेच्या निवडणुकीतही युतीचे प्रयत्न झाले. भाजपने कुंभारे यांच्या पक्षाला उपाध्यक्ष व सहा नगरसेवकाच्या जागा देऊ केल्या होत्या. मात्र कुंभारे यांनी अध्यक्षपदाची जागा मागितली. त्यानंतर त्यांचे फाटले. दोघेही नेते आपल्या आग्रहावर अडून राहिले. एकमेकांच्या विरोधात उभे केले. मतदान आटोपल्यावर झाले गेले विसरून सर्व विसरून जातील असे सर्वांना वाटत होते. मात्र मतदानाच्या दिवशीच दोघांमधील वाद उफाळून आले.

भाजपचे नगराध्यक्षपदाचे उमेदवार अजय अग्रवाल यांच्या फार्म हाउसवरून पैसे वाटप केले जात आहे, दारू पुरवठा सुरू असल्याचा आरोप कुंभारे यांनी केला. आरोपाचा एक व्हीडीओ तयार करून तो सोशल मीडियावर टाकला. बावनकुळे यांच्यावरही त्यांनी या व्हिडिओतून आरोप केले आहेत. त्यामुळे भाजपच्या गोटात चांगली अस्वस्थता निर्माण झाली आहे.

भाजपने तातडीने अजय अग्रवाल यांना सांगून आरोपांचे खंडन करायला लावले. ज्या फार्म हाउसवर धाड पडली ते विजय अग्रवाल यांचे आहे आणि ते कामठी नगरपालिका मतदारसंघाबाहेर असल्याचा दावाही करण्यात आला आहे. एकेकाळी गडकरी यांचे कट्टर समर्थक असलेले बावनकुळे आता मुख्यमंत्री देवेंद्र फडणवीस यांचे हनुमान झाले आहेत. हेच बाब कुंभारे यांना खटकली असून यातूनच हा वाद उभा झाला असल्याचे राजकीय वर्तुळात बोलले जात आहे.