Local Body Elections : खबर पक्की! नोव्हेंबरमध्ये जिल्हा परिषदेची निवडणूक,महापालिकेचाही मुहूर्त ठरला!

Local Body Elections Date : सुप्रीम कोर्टाने महाराष्ट्रातील स्थानिक स्वराज संस्थांच्या निवडणुकीवर सुनावणी घेताना 31 जानेवारीच्या आधी सर्व निवडणुका घेण्याचे निर्देश दिले आहेत. त्यामुळे डिसेंबर आणि जानेवारीमध्ये निवडणूक होईल, अशी शक्यता वर्तवण्यात येत होती. मात्र, दिवाळीनंतर निवडणुकीचे बार उडणार असून तीन टप्प्यांमध्ये निवडणूक होणार असल्याचे सुत्रांच्या हवालाने एका मराठी वृत्तवाहिनीने वृत्त दिले आहे.

दिवाळीनंतर नोव्हेंबरमध्ये जिल्हा परिषद निवडणुकीचा बार उडणार आहे. जिल्हा परिषदेची प्रारुप प्रभाग रचना पूर्ण झाली आहे. तसेच जिल्हा परिषद अध्यक्षांचे आरक्षण देखील जाहीर करण्यात आले आहे. आता गट आणि गणाच्या आरक्षणाची प्रतिक्षा इच्छुकांना आहे. जिल्हा परिषद निवडणूक प्रथम त्यानंतर नगपालिका आणि शेवटी महानगपालिका निवडणूक अशा तीन टप्प्यांमध्ये निवडणूक घेण्यात येणार आहे.

महापालिका निवडणूक डिसेंबर ते जानेवारी या दोन महिन्याच्या कालावधीमध्ये घेण्याचे नियोजन असल्याचे सांगितले जात आहे. विशेषत: मुंबई महापालिकेची निवडणूक ही जानेवारीमध्ये घेतली जाणार असल्याचे सांगितले जात आहे. मुंबईसह पुणे आणि ठाणे महापालिका निवडणूक देखील जानेवारीमध्येच होण्याची शक्यता आहे.

इच्छुकांकडून छुपा प्रचार

महापालिका आणि जिल्हा परिषद, पंचायत समितीच्या प्रारुप प्रभाग रचना जाहीर करण्यात आल्या आहेत. आता इच्चुकांना आरक्षण कोणते पडणार याची प्रतीक्षा आहे. तसेच महायुती, आघाडी होणार की नाही याचे चित्र अजुनही स्पष्ट नाही. स्थानिक पातळीवर याबाबत निर्णय घेणार असल्याचे राजकीय पक्षांकडून सांगण्यात येत आहे. त्यामुळे युती, आघाडीची प्रतीक्षा न करता इच्छुकांकडून छुपा प्रचार सुरू करण्यात आला आहे. आपला प्रभाग, गट, गणामध्ये भेटीगाठी सुरू केल्या असून पक्षाच्या उल्लेख न करता प्रचाराला सुरुवात करण्यात आली आहे.

14 लाख मतदार वाढले

विधानसभा निवडणुकीनंतर मागील सात महिन्यांमध्ये तब्बल 14 लाख 71 हजार 507 मतदारांची भर पडली आहे. या वाढलेले मतदारांचा स्थानिक स्वराज संस्था निवडणुकीत थेट परिणाम होणार आहे. विशेष म्हणजे वाढलेल्या मतदारांबाबत कुठल्याही राजकीय पक्षाने आक्षेप निवडणुक आयोगाकडे नोंदवला नाही. एक जुलैपर्यंत अद्ययावत केलेली मतदारयादी स्थानिक स्वराज संस्थांच्या निवडणुकीत वापरण्यात येणार आहे.