Thane Politics : 'भुंकणाऱ्या कुत्र्यासारखा***, तुझ्यामुळे दिघेंना टाडा लागला', संजय राऊतांवर टीका करताना म्हस्केंची जीभ घसरली

राहुल क्षीरसागर

Narendra Mhaske News : 'तू आनंद दिघे यांना नेहमी पाण्यात बघितले. तुझ्या एका मुलाखतीमुळे दिघे यांना टाडा लागला होता. सांभाळून बोल अन्यथा तुला तुझी जागा दाखवून द्यावी लागेल,' असा इशारा शिवसेना प्रवक्ते तथा खासदार नरेश म्हस्के यांनी खासदार संजय राऊत यांना दिला. संजय राऊतांनी शिवसेना उद्धव बाळासाहेब ठाकरे पक्षातील नेत्यांना आनंद दिघेंचा फोटो लावू नका, असा अप्रत्यक्ष संदेश दिलाचा आरोप देखील म्हस्के यांनी केला आहे.

पुढे बोलताना ते म्हणाले, 'दिघे यांच्यावर टिका करणाऱ्या संजय या भुंकणाऱ्या कुत्र्याची योग्यता काय? दिघे यांनी ठरविले असते तर ते आमदार, खासदार मंत्री देखील झाले असते. मात्र त्यांनी कार्यकर्त्यांना मोठे करण्याचे काम केले. संजय राऊत राहतो त्याठिकाणी साधा एक नगरसेवक निवडून आणू शकत नाही, आमच्या जीवावर तू खासदार झाला.'

'उबाठामधील नेत्यांना दिघे यांची कळकळ असेल तर त्यांना आव्हान आहे की संजय राऊत यांचा निषेध करावा. अन्यथा तुम्हाला दिघे प्रेमी जनता ठाणे जिल्ह्यात नव्हे तर राज्यात फिरू देणार नाही.', असा इशारा देखील त्यांनी दिला.

'राऊत याने नेहमी दिघे यांचा अपमान केला. त्यांचे जिल्हाप्रमुख पदही काढण्यासाठी त्यांचे प्रयत्न होते. डॉ. काशिनाथ घाणेकर नाट्यगृहाला दिघे यांचे नाव द्यावे, असा आमचा प्रयत्न होता. परंतु त्यांनी ते करु दिले नाही.', असा गौप्यस्फोटही म्हस्के यांनी केला.

राजन विचारेंना प्रत्युत्तर

काही दिवसांपूर्वीच माजी खासदार राजन विचारे यांनी एकनाथ शिंदे यांना शेंदुर लावल्यानेच ते आमदार, मंत्री झाल्याची टिका केली होती. त्याला म्हस्के यांनी प्रतिउत्तर दिले. ते म्हणाले, दिघे आणि बाळासाहेब ठाकरे यांच्या आशीर्वादामुळे एकनाथ शिंदे हे आमदार, मंत्री झाले हे खरे आहे. मात्र, तुम्हाला तर शिंदे यांनीच शेंदूर लावले होते, हे विसरु नका. दरम्यान, संजय राऊत यांच्या वक्तव्याचा निषेध म्हणून टेंभी नाका येथील आनंद आश्रम येथे युवा सेनेच्या माध्यमातून राऊत यांचा फोटा जाळण्यात आला तसेच घोषणाबाजी करण्यात आली.

संजय राऊत नेमके काय म्हणाले?

नरेंद्र मोदी यांच्या वाढदिवसा निमित्त एकनाथ शिंदेंच्या शिवसेनेकडून वर्तमानपत्रात जाहिरात देण्यात आले होत्या. त्यामध्ये बाळासाहेब ठाकरे यांच्या शेजारी आनंद दिघे यांचा फोटो होता. त्यावरून हिंदूहृदयसम्राट बाळासाहेब ठाकरेंच्या बाजूला जिल्हाप्रमुख असलेल्या आनंद दिघेंचा फोटो लावून तुम्ही काय साध्य करताय? असा सवाल राऊत यांनी केला होता.