Ajit Pawar on Raj Thackeray : 'उद्योग शिल्लक नाहीत, म्हणून..'; अजितदादांनी राज ठाकरेंना फटकारलं

Maharashtra politics 2025 : त्रिभाषा सूत्रानुसार राज्यात इयत्ता पहिलीपासून हिंदी भाषा विषय सक्तीचा करण्याचा निर्णय महायुतीनं घेतला आहे. या निर्णयाला मनसे प्रमुख राज ठाकरे यांनी तीव्र विरोध केला असून, मराठीचा बळी देऊन हिंदीचं सक्तीकरण खपवून घेणार नाही, असा इशारा दिला आहे.

यावर उपमुख्यमंत्री अजित पवार यांनी, 'ज्यांना काही उद्योग शिल्लक नाही ते हिंदी भाषेचा विरोध करत आहे', असा टोला लगावला आहे.

अजित पवार (Ajit Pawar) म्हणाले, "हिंदी आपली राष्ट्रभाषा आहे, मराठी आपली ही मातृभाषा आहे. तसेच, इंग्रजी ही जागतिक भाषा आहे. तिन्ही भाषा आपल्यासाठी महत्वाच्या आहे. हिंदीला विरोध करण्याच काही कारण नाही, कारण की मराठी आपली मातृभाषा आहे. काही महिन्यांपूर्वी केंद्र सरकारने मराठी भाषेला अभिजात भाषेचा दर्जा दिला आहे".

'त्यामुळे ज्यांच्याकडे काही उद्योग नाही, ते हिंदी भाषेला विरोध करत आहेत', अशी टीका अजित पवार यांनी नाव न घेता राज ठाकरे यांच्यावर केली आहे. अजित पवार यांनी हिंदी भाषेवरून राज ठाकरेंचे नाव न घेता थेट मनसेवर (MNS) निशाणा साधल्याने त्याची रिअ‍ॅक्शन काय येते, याकडे आता लक्ष असणार आहे.

नाशिक दंगली प्रकारावर टार्गेट ठेवून एका पक्षाच्या कार्यकर्त्यांविरोधात गुन्हे दाखल करण्याचे कटकारस्थान सुरू आहे. यावर अजितदादा यांनी नाशिक दंगल प्रकरणात आम्ही कुठल्या पक्षाचा कार्यकर्ता म्हणून केस दाखल करत नाही, जे दोषी असतील त्यांच्यावर योग्य कारवाई केली जात आहे, असे सांगितले.

बीडचे निलंबित पोलिस उपनिरीक्षक अभिजीत कासले याने केलेल्या आरोपांची सर्व चौकशी केली जाणार आहे. त्यानंतरच योग्य ती पुढची कारवाई होईल, असेही अजित पवार यांनी म्हटले. बीडमध्ये ज्या महिलेला अमानुष मारहाण झाली आहे, त्याची देखील दखल अजित पवार यांनी घेतली आहे. घटनेचे छायाचित्र मला मिळाले आहेत, जे दोषी असतील त्यांच्यावर योग्य कायदेगीर कारवाई केली जाईल, अशी माहिती अजित पवार यांनी दिली.