Uddhav Thackeray On Ajit Pawar: 'अजित पवारांचं 'ते' वक्तव्य अत्यंत वाईट, सगळं मिळाल्यानंतरही अन्यायाचा टाहो फोडणं.. ; ठाकरेंनी सुनावलं!

Awaaz Kunacha Podcast: उपमुख्यमंत्री अजित पवार (AJit Pawar) यांचा शिंदे-फडणवीस सरकारमध्ये समावेश झाला. यामुळे राष्ट्रवादी काँग्रेसमध्ये फूट पडून दोन गट निर्माण झाले. यानंतर शरद पवार गट आणि अजित पवार गट या दोन्ही बाजूंनी एकमेकांवर आरोप - प्रत्यारोप, टीका-टिपण्णी सुरू झाली. उपमुख्यमंत्री झाल्यानंतर पहिल्याच सभेत अजित पवारांनी शरद पवारांच्या निवृत्तीवर भाष्य केले होते. आता याच मुद्द्यावरून शिवसेना ठाकरे गटाचे प्रमुख उद्धव ठाकरे यांनी अजित पवारांना सुनावले आहे. (Latest Marathi News)

ठाकरे गटाचे नेते आणि खासदार संजय राऊत यांनी उद्धव ठाकरे यांची दैनिक ‘सामना’साठी मुलाखत घेतली आहे. या मुलाखतीचा पहिला भाग काल (दि. २६) आणि दुसरा भाग आज प्रसिद्ध झाला आहे. या मुलाखतीमध्ये ठाकरेंनी विविध विषयांवर आपली रोखठोक मते मांडली आहेत. या मुलाखतीत संजय राऊतांनी प्रश्न विचारला की, "अजित पवारांनी आपल्या काकांबद्दल किंवा पक्षप्रमुखांबद्दल मत व्यक्त केलं आहे. शरद पवारांनी आता राजकारणातून निवृत्त व्हायला हवं, त्यांचं वय झालंय. अजित पवारांच्या या वक्तव्यावर आपलं काय मत आहे?"

राऊतांनी अजित पवार यांच्या संदर्भात विचारलेल्या या प्रश्नावर उत्तर देताना ठाकरे म्हणाले, "अजित पवारांचं हे मत अत्यंत वाईट होतं. शेवटी ज्यांच्याकडून आपण सर्व काही घेतो, त्यांच्याबद्दल असे उद्गार काढणे शोभा देणारे नाही. नेहमी आपण वडीलधाऱ्यांचा मान - सन्मान आदर राखत असतो. अजित पवारांच हे वक्तव्य मलासुद्धा आवडलं नाही."

उद्धव ठाकरे पुढे म्हणाले, "तुमचं काही पटत नसेल तर जाहीरपणे सांगा. शरद पवारांनी या वयातही तुम्हाला सर्व काही दिलं. आता त्यांनाच तुम्ही अशा पद्धतीने बोलणं हे मला देखील पटलेलं नाही. अजित पवारच काय कोणालाही स्वार्थासाठी जायचं असेल तर त्यांनी स्वार्थासाठी जातोय, असं खरं बोलून बाहेर पडावं. या खरेपणामुळे कदाचित लोक तुम्हाला स्वीकारतील. पण सगळं काही मिळाल्यानंतर, सर्व काही दिल्यानंतरही अन्याय झाला म्हणून टाहो फोडून जाणं, हे बरोबर नाही."