Sharad Pawar Vs Ajit Pawar : अजितदादांची साथ सोडणाऱ्यांना माफ करणार नाही; राष्ट्रवादीचा इशारा

Maharashtra NCP Political News : विधानसभा निवडणूक जवळ येईल तशी अनेक राजकीय नेत्यांची चलबिचल सुरू झाल्याचे दिसून येत आहे. आपले राजकीय भविष्य सुरक्षित करण्यासाठी महायुती - महाविकास आघाडीत इनकमिंग - आऊटगोईंग सुरू झाले आहे. याचा फटका राष्ट्रवादीच्या अजित पवार गटाला जास्त बसत असल्याचे दिसते.

सध्या राष्ट्रवादीत अतुल बेनके, चेतन तुपे आणि नरहरी झिरवाळ हे शरद पवार गटात जाणार असल्याच्या चर्चा सुरू आहेत. त्यावर अजित पवार गटाचे नेते अमोल मिटकरी यांनी सूचक इशारा दिला आहे.

अजित पवार Ajit Pawar गटातील नेते माजी आमदार बाबाजानी दुर्राणी यांनी शरद पवार गटात प्रवेश केला आहे. आमदार नरहरी झिरवळ हे आपली भूमिका जाहीर करणार आहेत. तर आमदार चेतन तुपे पवारांच्या व्यासपीठावर दिसले. यावर अजित पवार गटाचे नेते अमोल मिटकरी यांनी सोडून जाणाऱ्यांना जनता माफ करणार नाही, असा सूचक इशारा दिला आहे.

मिटकरी म्हणाले, अजित पवारांची साथ सोडून बाहेर पक्षात जात असलेल्या गद्दारांना जनता माफ करणार नाही. अजितदादांनी अमोल कोल्हे, निलेश लंके, बाबाजानी दुर्राणी यांच्यासारख्या लोकांना खूप काही दिले आहे. त्यानंतरही त्यांनी विश्वासघात केला आहे, असा आरोपही मिटकरींनी केला.

मिटकरींनी चेतन तुपे हे शरद पवारांच्या Sharad Pawar व्यासपीठावर गेल्याच्या मुद्द्यावर हे स्पष्टीकरण दिले आहे. एखाद्या नेत्याच्या व्यासपीठावर जाणे म्हणजे त्या पक्षात प्रवेश करणे नव्हे, असे ते म्हणाले. दरम्यान, लवकरच राष्ट्रवादीत मोठ्या प्रमाणात इन्कमिंग होणार असल्याचाही गौप्यस्फोट आमदार मिटकरी यांनी यावेळी केला आहे.