Arvind Kejriwal Meet Uddhav Thackeray : दिल्लीचे मुख्यमंत्री केजरीवाल 'मातोश्री'वर जाणार, विरोधकांची मोट बांधणार?

Uddhav Thackeray : शिवसेना पक्षाचं नाव आणि धनुष्यबाण चिन्ह मुख्यमंत्री शिंदेंना बहाल झाल्यानंतर ठाकरे गटाचे प्रमुख उद्धव ठाकरे अँक्शन मोडवर आलेले दिसून येत आहेत. आम आदमी पार्टीचे राष्ट्रीय संयोजक आणि दिल्लीचे मुख्यमंत्री अरविंद केजरीवाल व पंजाब मुख्यमंत्री भगवंत मान हे आज उद्धव ठाकरे यांची भेट घेणार आहेत. काँग्रेसला सोबत घेऊन भाजपविरोधी राष्ट्रीय पातळीवर विरोधी पक्षांची मोट बांधण्याबाबत या बैठकीत चर्चा होणार असल्याची शक्यता आहे.

उद्धव ठाकरे हे मार्च महिन्याच्या अखेरीस मुंबईमध्ये २०२४ च्या लोकसभा निवडणुकीच्या अनुषंगाने राष्ट्रीय स्तरावरील विरोधी पक्षांच्या नेत्यांची भव्य सभा आयोजित करण्याच्या तयारीत, असल्याचे सांगण्यात येत आहे. यामुळे आता ठाकरे हे पंतप्रधान मोदींचा रथ रोखण्यासाठी अधिक आक्रमक झालेले दिसून येत आहेत.

दरम्यान, अरविंद केजरीवाल हे एक दिवसीय मुंबई दौऱ्यावर आहेत. यानंतर या दोन्ही नेत्यांच्या बैठकीचं आयोजन करण्यात आलेलं आहे. अरविंद केजरीवाल (Arvind Kejariwal) हे उद्धव ठाकरे यांच्या भेटीसाठी 'मातोश्री'वर जाणार आहेत. या बैठकीत विरोधा पक्षांनी कसं एकत्र आलं पाहिजे, यावर चर्चा होण्याची शक्यता आहे.

काँग्रेसला सोबत घेऊनच २०२४ च्या लोकसभा निवडणुकांसाठी रणनीती आखली जावी, असा प्रस्ताव ठाकरे हे केजरीवालांना सादर करतील, अशी शक्यता आहे. यामुळे या बैठकीकडे राजकीय वर्तुळाचे लक्ष लागले आहे. यानंतर अरविंद केजरीवाल याला कसा प्रतिसाद देतील, काय भूमिका घेतील, याकडे ही सर्वांचे लक्ष लागले आहे.