"शिवसेनेत जसे साबिर शेख होते, तसे हिंदुत्वाचे शिलेदार अब्दुल सत्तार" ; शिंदेंनी केली प्रशंसा

मुंबई : मुंबईच्या बीकेसी मैदानावर काल दसऱ्याच्या दिवशी मुख्यमंत्री एकनाथ शिंदे यांचा मेळावा पार पडला. शिंदेंनी भाषणात उद्धव ठाकरेंच्या शिवसेनेवर जोरदार प्रहार केला. बीकेसीवर एकनाथ शिंदेची तोफ कोणावरधडधडणार याची सर्वांनाच उत्सुकता होती. बीकेसी सारखे मोठे मैदान गर्दीने खचून भरले होते. शिंदेंनी लिहून आणलेले मुद्दे आणि केलेल्या भाषणाची चर्चा झाली. (Cm Shinde Dasara Melava)

यावेळी बोलताना मुख्यमंत्री शिंदेंनी दिवंगत शिवसैनिक साबिर शेख यांचा उल्लेख केला. शिवसेनेच्या प्रखर हिंदुत्वाचे शिलेदार जसे शिवसैनिक साबिर शेख होते, तसेच आमच्यासोबत हिंदुत्वाचे शिलेदार अब्दुल सत्तार आहेत.अब्दुल सत्तार हे आमच्याकडचे हिंदुत्ववादी सत्तार आहेत, अशा शब्दात मुख्यमंत्र्यांनी सत्तारांची प्रशंसा केली.

कोण होते साबिर शेख ?

साबीर शेख मूळ पुणे जिल्ह्यातील नारायणगावचे. साबीरभाई मुसलमान असले त्यांच्या घरात प्रवचन आणि अध्यात्माची परंपरा सुरू होते. साबीरभाई वडील प्रवचनकार होते. अशा वातावरणामुळे साबीरभाईंना संतसाहित्यात रूची निर्माण झाली.

ज्ञानेश्वरी असो, रामदास, तुकोबारायांचे काव्य- अभंग त्यांना तोंडपाठ होते. त्यांच्या गावापरिसरातली शिवनेरी, हरिश्चंद्रगड, नारायणगड, ढाकोबा अशा अनेक गडकिल्ल्यांच्या वास्तव्यात ते वाढले. शिवछत्रपतींच्या इतिहासाबद्दल त्यांना आकर्षण होते. आपल्या संस्कृतीची त्यांना आवड होती.

महाराष्ट्रात जेव्हा पहिल्यांदा शिवसेनेचे सरकार आले, तेव्हा खुद्द बाळासाहेबांनी साबीर भाईंना कामगार मंत्रालयाची जबाबदारी दिली. त्यांनी स्वतः कामगार म्हणून काम केले होतो.मंत्रीपदावर असताना अनेकदा व्यवस्थेविरोधात जाऊन त्यांनी कामगारांची बाजू घेतली.

मंत्री राहिलेल्या, तीन वेळा आमदार राहिलेल्या साबीर भाई शेख यांनी स्वतःसाठी मात्र काही पैसा, संपत्ती जमवून ठेवली नाही.आमदार असतानाही ते कल्याण येथे चाळीत वास्तव्य करत होते.