मोठी बातमी! काँग्रेसचे नेते निरुपम यांना पोलिसांनी घेतलं ताब्यात.. नेमकं कारण काय?

Sanjay Nirupam News : काँग्रेसचे मुंबईतील नेते संजय निरुपम (Sanjay NIrupam) यांना पोलिसांनी ताब्यात घेतलं आहे.

निरुपम हे शिवसेना (शिंदे गट) खासदार गजानन कीर्तिकर यांच्या विरोधात बाईक रॅली काढणार होते. मात्र त्याआधीच त्यांना वर्सोवा पोलिसांनी ताब्यात घेतलं आहे. ताब्यात घेतल्याची माहीती खुद्द निरूपमांनी ट्विटरवरून दिली आहे. (congress leader sanjay nirupam Latest News)

दरम्यान, खासदार कीर्तिकर यांनी दोन दिवसांपूर्वीच बाळासाहेबांची शिवसेनेत (शिंदे गट) प्रवेश केला होता. कीर्तिकर हे उत्तर पश्चिम मुंबई लोकसभा मतदारसंघाचे खासदार आहेत. कीर्तिकरांनी शिंदे गटात केलेला प्रवेश हा मतदारांचा अपमान असल्याने त्यांनी खासदारकीचा राजीनामा द्यावा, अशी मागणी निरुपम यांनी केली आहे.

निरुपम यांच्या नेतृत्वाखाली आज (ता.१६ नोव्हेंबर) दुपारी बाईक रॅली काढण्यात येणार होती. मात्र या आधीच पोलिसांनी त्यांना त्यांच्या घरातून ताब्यात घेतलं. तसेच त्यांना रॅली काढण्यापासून रोखलं आहे.

निरुपम याबाबत ट्वीटमध्ये म्हणाले की, "आमचे खासदार गजानन कीर्तिकर यांच्या मतदारसंघातील त्यांच्या निष्क्रियतेमुळे त्यांनी पदाचा राजीनामा द्यावा. कीर्तिकर यांच्यावर दबाव आणण्यासाठी मी बाईक रॅलीचे आयोजन केले होते. आमच्या शांततापूर्ण रॅलीला परवानगी देण्याऐवजी पोलिसांनी कोणताही आदेश न दाखवता मला जबरदस्तीने ताब्यात घेतले", अशी माहीती त्यांनी ट्विटरवरून दिली.

दरम्यान, ''कीर्तीकर हे निष्क्रीय खासदार आहेत. त्यांनी पक्ष सोडला तसे पदही सोडावे, या मागणीसाठी आम्ही रॅली काढणार होतो, पण त्याआधीच पोलिसांनी आम्हाला रोखलं व मला ताब्यात घेतलं'', असंही निरुपम आपल्या ट्विटमध्ये म्हटले आहे.