Assembly Election 2024 : हरियाणाच्या निकालानंतर महाविकास आघाडीत जाण्यासाठी कुंपणावर बसलेले भाजपचे नेते काय करणार?

Maharashtra Politics: हरियाणात स्बवळावर लढत भाजपने सत्ता खेचून आणली आहे. येथे भाजपनं 48 जागा मिळवत एकहाती सत्ता मिळवली आहे. हरियाणातील विजयानंतर महाराष्ट्रातील भाजपचा 'कॉन्फिडन्स' वाढला असून महायुतीची सत्ता येईल, असा आत्मविश्वास उपमुख्यमंत्री देवेंद्र फडणवीस यांनी व्यक्त केला आहे. लोकसभेत धक्क्यांवर धक्के बसल्यानंतर महायुतीच्या कार्यकर्त्यांचा 'कॉन्फिडन्स' गेला होता. मात्र, हरियाणातील विजयानंतर कार्यकर्त्यांमध्ये नवचैतन्य निर्माण झालं आहे.

लोकसभा निवडणुकीत महायुतीनं '42 पार'चा नारा दिला होता. मात्र, 17 जागा जिंकताना महायुतीला नाकीनऊ आलं होतं. सगळ्यात मोठं नुकसान झालं ते भाजपचं (BJP). लोकसभेला भाजपनं 28 जागा लढविल्या. पण, 9 ठिकाणीच भाजपला यश मिळालं. त्यामुळे भाजपच्या कार्यकर्त्यांमध्ये उदासीनता आली होती.

त्यासह शिवसेना ( शिंदे गट ), राष्ट्रवादीमुळे ( अजित पवार ) इच्छुकांना उमेदवारी मिळणार नाही, मंत्रिपद, महामंडळ मिळालं नसल्यानं भाजपमधील पदाधिकारी आणि कार्यकर्ते नाराज आहेत. नाराज किंवा महायुतीतून उमेदवारी मिळू न शकलेल्या नेत्यांचा शिवसेना ( ठाकरे गट ), काँग्रेस ( Congress ) आणि सर्वाधिक राष्ट्रवादी काँग्रेसकडे ( शरदचंद्र पवार ) ओढा आहे.

लोकसभेनंतर विधानसभेलाही महाविकास आघाडी चमत्कार घडवेल, असा दावा आघाडीच्या नेत्यांकडून केला जात आहे. हर्षवर्धन पाटील, समजितसिंह घाटगे, अशा भाजप नेत्यांसह अजितदादांच्या राष्ट्रवादीतील अनेकांनी पक्षाला रामराम ठोकला आहे. अनेक नेते जाण्याच्या तयारीत आहेत.

परंतु, हरियाणातील विजयामुळे महाराष्ट्रातही भाजप आणि महायुतीची सत्ता येईल, असा आत्मविश्वास भाजप नेत्यांकडून वर्तवला जात आहे. त्यामुळे जे नेते भाजपमधून उद्धव ठाकरेंची शिवसेना, शरद पवारांची राष्ट्रवादी आणि काँग्रेसमध्ये जाण्यासाठी कुंपणार वाट पाहत होते, ते आता देशातील जनता भाजपच्या पाठीशी आहे, हे लक्षात आल्यानं माघारी फिरतील, असा विश्वास भाजप नेत्यांना वाटत आहे.