BJP News: मुंबई महापालिका निवडणुकीची भाजपची रणनीती ठरली?; जे.पी.नड्डांनी पदाधिकाऱ्यांना दिला 'हा' कानमंत्र

Mumbai : भाजपचे राष्ट्रीय अध्यक्ष जे.पी.नड्डा हे दोन दिवसांच्या महाराष्ट्र दौऱ्यावर आहेत. त्यांचा हा दौरा आगामी लोकसभा, विधानसभा आणि महापालिका निवडणुकीच्या पार्श्वभूमीवर महत्वाचा मानला जात आहे.

आगामी मुंबई महापालिका निवडणुकीच्या तयारीच्या दृष्टीने देखील भाजप रणनीती आखत आहे. यातच जे.पी.नड्डा मुंबईत दौऱ्यावर असून त्यांनी आज भाजपा मोर्चा आघाडीची बैठक घेतली आहे. या बैठकीत त्यांनी भाजपच्या पदाधिकाऱ्यांना आगामी निवडणुकीच्या तयारीच्या दृष्टीने काही कानमंत्र दिले आहेत.

"केंद्र सरकारच्या योजना सर्वसामान्यापर्यंत पोहचवण्यासाठी प्रयत्न करा. पक्ष संघटना मजबूत करण्यासाठी भाजपच्या पदाधिकाऱ्यांनी, कार्यकर्त्यांनी आपल्याबरोबर इतरांना जोडण्याचं कामं करा. तुमच्या परिसरातील लोकांना भेटा, असं सांगत सरकारचं काम जनतेपर्यंत पोहचवा", असं आवाहन जे.पी.नड्डा यांनी पदाधिकाऱ्यांना केलं आहे.

जे.पी.नड्डा दोन दिवस महाराष्ट्र दौऱ्यावर आहेत. या दोन दिवसांत त्यांच्या अध्यक्षतेखाली विविध कार्यक्रमाचे आयोजन करण्यात आले आहे. या दौऱ्यात निवडणूक तयारीचा आणि राजकीय परिस्थितीचा आढावा ते घेणार आहेत.

दरम्यान, भाजपची गुरुवारी (दि.18 मे) पुण्यात राज्य कार्यकारिणीची बैठक आहे. आगामी महापालिका निवडणुकीच्या पार्श्वभूमीवर ही बैठक महत्वाची असणार आहे. या बैठकीला प्रदेशाध्यक्ष चंद्रशेखर बावनकुळे, उपमुख्यमंत्री देवेंद्र फडणवीस यांच्यासह भाजपचे नेते, आमदार, खासदार यांच्यासह पदाधिकारीही उपस्थित असणार आहेत. त्यामुळे आता पुण्यातील बैठकीत काय रणनीती ठरते, याकडे सर्वांचे लक्ष लागले आहे.

Edited By- Ganesh Thombare