BJP News : जुन्या नेत्यांना भाजपची साद ; पक्ष कामापासून दूर ठेवलेल्या नेत्यांवर महत्वाची जबाबदारी

BJP Old leaders in election campaigning news update : येत्या काही महिन्यात होणाऱ्या निवडणुकांच्या पार्श्वभूमीवर भाजप नव्या- जुन्या नेत्यांची फळी उभी करणार आहे. मागील काही वर्षे पक्षामध्ये सक्रिय नसलेल्या नेत्यांना भाजप पुन्हा सक्रिय करणार आहे. त्यासाठी भाजपने आपल्या जुन्या नेत्यांना निवडणूक प्रचाराच्या रिंगणात उतरण्यासाठी साद घातली आहे.

नव्या दमाच्या पिढीसोबत भाजपने अनुभवी नेत्यांनाही मैदानात उतरविण्याची योजना आखली आहे. गेली अनेक वर्षे भाजपसाठी निष्ठेने काम केलेल्या पण मागील काही दिवस पक्ष कामापासून स्वतःला दूर ठेवलेल्या नेत्यांवर भाजप देणार महत्वाची जबाबदारी देणार आहे.

स्व.उत्तमराव पाटील अमृतकुंज अभियानासाठी भाजपचे ज्येष्ठ नेत्यांवर महत्वाची जबाबदारी दिली आहे. यात मधु चव्हाण यांच्याकडे प्रदेश संयोजक पदाची जबाबदारी भाजपने दिली आहे.

2024 विधानसभा निवडणुकीत भाजपा 240 जागा लढवण्याच्या तयारीत असल्याचं भाजप प्रदेशाध्यक्ष चंद्रशेखर बावनकुळे यांनी नुकतेच सांगितलं. ते भाजपा महाराष्ट्र सोशल मीडिया अभ्यास वर्गास बोलते होते. यावेळी बावनकुळे यांनी सर्वांना आगामी निवडणुकांसाठी सज्ज राहण्याचे आवाहन केले.

भाजपने 240 जागा लढवण्याची तयारी केल्यामुळे एकनाथ शिंदे यांच्या शिवसेनेला फक्त 48 जागा येणार आहेत. चंद्रशेखर बावनकुळे यांच्या वक्तव्यानंतर राजकीय चर्चेला उधाण आले आहे. त्यामुळे आता यावर शिंदे गटाच्या शिवसेनेकडून काही प्रतिक्रिया येणार का? हे लवकरच समजेल.

शिंदे गटाचे सध्या 40 आमदार असून काही अपक्ष आमदारही त्यांच्याबरोबर आहेत. त्यामुळे विद्यमान आमदारांच्या जागा वगळता भाजप शिंदे गटासाठी जादा जागा सोडणार नाही, असे बावनकुळे यांनी केलेल्या वक्तव्यावरुन दिसून येत आहे. बावनकुळे यांच्या या वक्तव्यानंतर राजकीय वातावरण तापण्याची शक्यता आहे.

भाजपने मिशन २०२४ साठी जोरदार तयारी सुरु केली आहे. आगामी लोकसभा निवडणुकीसाठी (२०२४) आपल्या काय योजना आहेत, हे भाजपने एका व्हिडिओच्या माध्यमातून दाखवले आहे.अँनिमेटेड व्हिडिओ भाजपने समाज माध्यमावर प्रसारित केला आहे. 'मुझे चलते जाना है...'असे या व्हिडिओला शीर्षक दिले आहे. साडेचार मिनिटांचा हा व्हिडिओ आहे. मोदी सरकारने गेल्या नऊ वर्षात केलेल्या विविध कामाचा आढावा या व्हिडिओत घेण्यात आल्याचे दिसते.