जगताप म्हणाले, ``तिकिट पिंपरी-चिंचवडला आहे, त्यामुळे मतदानाला गेलेच पाहिजे!``

मुंबई : चिंचवड विधानसभेचे भाजप (BJP) आमदार लक्ष्मण जगताप (Laxman Jagtap) हे आज पुन्हा एकदा खाजगी रुग्णवाहिकेने पिंपरी-चिंचवड (Pimpri-Chinchwad) वरून मुंबईमध्ये विधान परिषद निवडणुकीत (Legislative Council election) आपला मतदानाचा हक्क बजावण्यासाठी पोहचले आहेत. (Maharashtra vidhan parishad election 2022)

विधान भवनात जगताप पोहचल्यानंतर त्यांचे स्वागत विरोधी पक्षनेते देवेंद्र फडणवीस (Devendra Fadnavis) यांनी केले. यावेळी प्रवीण दरेकर आणि राम शिंदे उपस्थित होते. विधान परिषदेचे तिकिट भाजपने पिंपरी-चिंचवडच्या नेत्या उमा खापरे यांना दिले आहे. भाजपने पिंपरी-चिंचवडला तिकिट दिले आहे. त्यामुळे मतदानाला गेलेच पाहिजे, अशा भावना जगताप यांनी व्यक्त केल्या.

जगताप यांचे स्वागत केल्यानंतर फडणवीस यांनी माध्यमांशी संवाद साधला, ते म्हणाले, सकाळी मला असे कळले होते की त्यांना ताप आहे. मी फोन करुन सांगितले तुम्ही येऊ नका, तुम्ही आमच्यासाठी जास्त महत्त्वाचे आहे. मात्र, त्यानंतर १०.३० वाजता जगताप यांनी भाजपचे प्रदेशाध्यक्ष चंद्रकांत पाटील यांना फोन करुन सांगितले की मी मतदानाला येणार आहे. त्यांनी घरच्यांनाही सांगितले की मी मतदानाला जाणार आहे.

पिंपरी-चिंचवडचा त्यांना जास्त आनंद आहे. ही जी कमिटमेंट आहे, ती खुप मोठी आहे. लक्ष्मणभाऊ जनतेचे आणि जिद्दी नेते आहेत. त्यांना वाटत होते की पक्षाला आवश्यकता आहे. ती लक्षात घऊन ते या ठिकाणी आले आहेत. आम्ही नाही म्हटले असते तरी ते आले असते. यापेक्षा चांगले नेते पक्षासाठी कोण असू शकतात, अशी भावूक प्रतिक्रिया फडणवीस यांनी व्यक्त केली.

दरम्यान, राज्यसभेच्या निवडणुकीच्या वेळी देखील जगताप हे रुग्णवाहिकेतून मतदानाला आले होते. भाजपचा तिसरा उमेदवार विजयी झाल्यानंतर फडणवीस यांनी तो विजय जगताप आणि कसबा मतदार संघाच्या आमदार मुक्ता टिळक यांना समर्पित केला होती. त्यानंतर खासदार धनंजय महाडिक यांनी जगताप यांची चिंचवडला त्यांच्या निवासस्थानी भेट घेऊन आभार मानले होते.