BMC Mayor : मुंबईत महापौर कोण? ‘या’ नावांपैकी एक फिक्स, CM फडणवीस देणार धक्का?

BMC 2026 BJP : संपूर्ण देशाचं लक्ष लागलेल्या मुंबई महापालिकेच्या निवडणुकीत अखेर उद्धव ठाकरे आणि राज ठाकरे यांच्या युतीचा पराभव झाला. भाजप आणि शिवसेनेने बहुमताचा आकडा पार करत मुंबईची सत्ता काबीज केली. त्यानंतर आता मुंबईचा महापौर कोण होणार, याची उत्सुकता शिगेला पोहोचली आहे. मुंबईत भाजप सर्वात मोठा पक्ष ठरल्याने भाजपचाच महापौर होणार, हे स्पष्टच आहे.

मुंबईतील ठाकरेंची २५ वर्षांपासूनची सत्ता उखडून टाकण्यात अखेर भाजपला यश आले आहे. भाजप ८९ जागांसह सर्वात मोठा पक्ष ठरला आहे. तर मित्रपक्ष असलेल्या शिवसेनेला २९ जागांवर विजय मिळाला आहे. बहुमतापेक्षा त्यांच्याकडे चार नगरसेवक अधिक आहेत. मुख्यमंत्री देवेंद्र फडणवीस यांनी मुंबईचा महापौर हिंदू आणि मराठीच होईल, असे स्पष्ट केले आहे.

भाजपमधील ८९ नगरसेवकांमध्ये अनेक मातब्बर चेहरे आहेत. त्यामध्ये ठाकरेंची शिवसेना, काँग्रेसमधून आलेल्या काही नेत्यांचाही समावेश आहे. तसेच नेत्यांचे नातेवाईकही निवडून आले आहेत. त्यामुळे महपौरपदासाठी मोठी रस्सीखेच असणार, हे स्पष्टच आहे. त्यासाठी मोठे लॉबिंगही सुरू होईल. अर्थात ही सर्व गणितं महापौरपदाच्या आरक्षणावर अवलंबून असणार आहेत.  

महापौरपदासाठीची चर्चेतील नावे :

मुंबई महापालिकेत मिळालेल्या विजयानंतर मुख्यमंत्री देवेंद्र फडणवीस यांनी भाजपचा महापौर असेल, असे आज स्पष्ट केले आहे. महापौरपदाच्या शर्यतीत तेजस्वी घोसाळकर, मकरंद नार्वेकर, प्रकाश दरेकर, प्रभाकर शिंदे, प्रीती सातम, उज्ज्वला मोडक, डॉ. प्रज्ञा सामंत, राजेश्री शिरवडकर, शीतल गंभीर देसाई यांची नावे चर्चेत आहेत.

दरम्यान, महापालिका निवडणुकीत महायुतीला बहुमत मिळाले आहे. उद्धव ठाकरे यांच्या नेतृत्वाखालील शिवसेनेच्या तीन दशकांच्या सत्तेला या निवडणुकीत धक्का बसला आहे. या विजयाला फडणवीस यांनी ‘विकासाभिमुख शासनाचा विजय’ असे म्हटले आहे. ‘राज्यात नवीन राजकीय युगाची सुरुवात झाली आहे. हा विजय भाजपसाठी ऐतिहासिक मानला जात आहे. या विजयामुळे महाराष्ट्राच्या शहरी राजकारणात मोठे बदल घडले असून, नागरी प्रशासनात नवीन पर्वाची सुरुवात झाली आहे, ’ असे ते म्हणाले.