Video - CM Shinde and Jayant Patil : ...अन् भर सभागृहात मुख्यमंत्री शिंदेंनी जयंत पाटलांना दिली महायुतीत येण्याची 'ऑफर'!

Maharashtra Assembly Monsoon Session 2024 : सध्या महाराष्ट्राच्या विधिमंडळाचं पावसाळी अधिवेश सुरू आहे. यानिमित्त सभागृहात दररोज नवनवीन घडामोडी, किस्से घडत आहेत. सत्ताधारी आणि विरोधकांमध्ये शाब्दिक युद्ध सुरू आहे. याशिवाय एकमेकांवर कुरघोडी करण्याची आणि टोला लगावण्याची कुणीही संधी सोडत नसल्याचे दिसून येत आहे.

याचदरम्यान मंगळवारी राज्यपालांच्या अभिभाषणावरील आभार प्रस्तावर बोलताना मुख्यमंत्री एकनाथ शिंदे(Eknath Shinde) यांनी विरोधकांवर जोरदार निशाणा साधला. शिवाय राष्ट्रवादी काँग्रेस पार्टी-शरदचंद्र पवार पक्षाचे प्रदेशाध्यक्ष आणि आमदार असलेल्या जयंत पाटील यांना एक खुली ऑफर दिल्याचंही पाहायला मिळालं. ज्याची सध्या संपूर्ण राजकीय वर्तुळात चांगलीच चर्चा रंगली आहे.

मुख्यमंत्री एकनाथ शिंदे यांनी छत्रपती शिवाजी महाराजांनी वापरलेल्या वाघनखांच्या मुद्य्यावर बोलताना जयंत पाटीलयांना(Jayant Patil) महायुतीत सामील होण्याची ऑफर दिली. 'जयंतराव अजून तुम्ही तिकडे नकली वाघांबरोबर आहात, थोडं असली वाघांबरोबर या.' असं मुख्यमंत्री शिंदेंनी हसतहसत म्हणताच सत्ताधारी आमदारांमध्ये चांगलाच हशा पिकला. यावेळी मुख्यमंत्री शिंदेंच्या शेजारी उपमुख्यमंत्री फडणवीसही बसलेले होते.

याआधी मुख्यमंत्री शिंदेंनी, 'छत्रपती शिवाजी महाराजांची वाघनखे कधी आणणार? असं जयंतराव म्हणाले होते. ब्रिटनच्या म्युझियमशी सामजंस्य करार झाला आहे. लवकरच ही वाघनखे पाहायला मिळतील. जयंतराव या महिन्यातच वाघनखे मिळतील. त्या वाघनखांचा योग्य वापर आम्ही नक्की करू. ही वाघनखे ठिकठिकाणी दर्शनासाठी ठेवू.' असं जयंत पाटील यांना उद्देशून सभागृहात सांगितलं.

याशिवाय शालेय विद्यार्थ्यांच्या गणवेशाच्या मुद्य्यावर माहिती देताना मुख्यमंत्री शिंदे म्हणाले, 'आपल्याला लहान मुलं, त्यांचा गणवेश त्यांचा शालेय पोषण आहार यामध्ये कधीही तडजोड करायची नाही. त्यामध्ये कोणी जर तडजोड करत असेल तर त्यावर कठोर कारवाई करा. कारण हे पुण्याचं काम आहे. जो त्यामध्ये दिरंगाई, भ्रष्टाचार करेल त्याच्यावर कारवाई करा.'

(Edited by - Mayur Ratnaparkhe)