Thackeray Group: चार भिंतीच्या आड तरी CM पदाचा चेहरा ठरवा; ठाकरे गटाचा आग्रह

विधानसभा निवडणुकीपूर्वी मुख्यमंत्रीपदाचा चेहरा ठरवा, असा आग्रह महाविकास आघाडीतील काही नेते करीत असले तरी अद्याप यावर ठाकरे गट (Thackeray group) वगळता राष्ट्रवादी काँग्रेस शरद पवार गट आणि काँग्रेसने ठोस उत्तर दिलेले नाही.

विधानसभा निवडणुकीपूर्वी किमान चार भिंतीच्या आड तरी मुख्यमंत्रीपदाचा चेहरा ठरवण्यात यावा, अशी भूमिका शिवसेना ठाकरे गटाने घेतली असल्याची सुत्रांची माहिती आहे.

महाविकास आघाडीचा नुकताच मेळावा झाला. मेळाव्यात उद्धव ठाकरे यांनी मुख्यमंत्रीपदाचा चेहरा जाहीर करण्याची मागणी करीत त्या चेहऱ्याला आपला पाठिंबा दर्शवला होता. परंतु यावर काँग्रेस आणि शरद पवार गटाने प्रतिसाद दिला नाही. त्यानंतर पुन्हा एकदा मुख्यमंत्रीपदाचा चेहरा ठरवा, अशी चर्चा ठाकरे गटात सुरु झाली आहे.

ज्या पक्षाच्या सर्वाधिक जागा,त्याचा मुख्यमंत्री..हे सूत्र मान्य नसल्याचे उद्धव ठाकरेंनी यापूर्वीच जाहीरपणे स्पष्ट केले आहे. या सुत्रामुळे एकमेकांच्या जागा पाडल्या जातील, अशी भितीही ठाकरे यांनी व्यक्त केली होती.

महाविकास आघाडीत विधानसभा निवडणुकीसाठी मोठ्या हालचाली सुरु आहेत. मुख्यमंत्रीपदी कोण, याविषयी तीनही घटक पक्षात इंडिया आघाडीच्या बैठकीत एकमत झाले असले तरी या पदावरुन घटक पक्षांमध्ये रस्सीखेच सुरु आहे.

आघाडीची सत्ता आल्यास कोण मुख्यमंत्री होईल, या प्रश्नांचे उत्तर आघाडीच्या नेत्यांनी स्पष्टपणे दिलेले नाही. आघाडीच्या मेळाव्यात व्यासपीठावर शरद पवार आणि नाना पटोले उपस्थित असताना उद्धव ठाकरे यांनी मुख्यमंत्रीपदाचा उमेदवार ठरवा, मी त्याला पाठिंबा देतो, असे ठाकरे यांनी सांगितले. पण यावर पवार आणि पटोले यांनी कुठलेही भाष्य केले नाही.

ज्याचे जास्त आमदार त्यांचा मुख्यमंत्री, असे विधान काँग्रेसचे ज्येष्ठ नेते, माजी मुख्यमंत्री पृथ्वीराज चव्हाण यांनी काही दिवसापूर्वी केले होते. चव्हाणांच्या विधानाचा धागा पकडून शरद पवारांनी मुख्यमंत्रीपदाबाबत महत्वाचे विधान केले आहे.मुख्यमंत्रिपदाबाबत पृथ्वीराज चव्हाण यांनी मांडलेली भूमिका दुर्लक्ष करण्याजोगी नाही, असे पवार म्हणाले होते.