Ashok Chavan News : 'हमारे पास उद्धव ठाकरे, अजितदादा और पटोले है!' चव्हाणांची जोरदार फटकेबाजी

Ashok Chavan mumbai BKC News : आम्ही एकत्र आहोत आणि एकत्र राहणार आहोत. बाजार समितीच्या निवडणुकीत महाविकास आघाडीला जास्त जागा मिळाल्या. तीन्ही पक्ष एकत्र आल्यानंतर इतिहास घडतो, असे काँग्रेस नेते माजी मुख्यमंत्री अशोक चव्हाण म्हणाले.

महाविकास आघाडीची मुंबईतील बिकेसी मैदानावर वज्रमूठ सभा होत आहे. या सभेमध्ये अशोक चव्हाण यांनी भाजपवर हल्लाबोल केला. आगामी काळात आपल्याला सिक्सर मारायचा आहे. मुंबई महापालिका सुद्दा जिंकणारच आहोत. महापालिका, लोकसभा आणि विधानसभा आपल्याला जिंकायच्या आहेत. पुढील काळात संधीसाधू आणि आयाराम गयारामला लोक थारा देणार नाहीत. हमारे पास उद्धव ठाकरे (Uddhav Thackeray), अजितदादा और नाना पटोले है!, असे अशोक चव्हाण (Ashok Chavan) म्हणाले.

इंजिनची गरज काय आहे, आपले इंजिन ताकदवर आहे. ज्यांचे इंजिनमध्ये ताकद नसते त्यांना तीन-तीन इंजिनची गरज लागते. आपले एकच इंजन ताकदवर आहे. त्यामुळे इतर इंजिंनची गरज पडणार नाही. यांना मुंबईच्या महापालिकेतील ९२ हजार कोटी रुपये हवे आहेत. म्हणून त्यांना मुंबईची सत्ता हवी आहे, असा आरोप चव्हाण यांनी केला.

मुंबईच्या (Mumbai) पैसऱ्यावर यांची नजर आहे. यांचे इंजिन चिनच्या खुसखोरीबद्दल आणि महागाईबद्दल काहीच बोलत नाही, असा हल्लाबोल अशोक चव्हाण यांनी भाजपवर (BJP) केला. आज कर्नाटकमध्ये चांगल्या पद्धतीने ताकद मिळत आहे. कर्नाटकचा निकाल देशाची दिशा बदलणारा निकाल असणार आहे, असा विश्वास चव्हाण यांनी व्यक्त केला.

लोकांनी आपल्याला कौल दिला, तर कधी बाजूला बसवले. मात्र, आम्ही कधी याला फोड त्याला फोड असे केले नाही. उद्धव ठाकरे यांनी वर्षा सोडले त्यावेळी हजारो लोक रस्त्यावर आले होते. मुख्यमंत्री पद सोडत असतानाही उद्धव ठाकरे यांना ताकद देण्यासाठी लोक होते, असे चव्हाण यांनी स्पष्ट केले.