Devendra Fadnavis: फडणवीस अचानक दिल्लीला रवाना, अमित शहांची उद्या मुंबईत पत्रकार परिषद; सरकारमध्ये नेमकं काय सुरु?

Devendra Fadnavis Delhi Visit: गेल्या काही दिवसांपासून राज्यात आणि देशात वेगवेगळ्या घडामोडी सुरु आहेत. त्यात मराठा आरक्षणाचा मुद्दा, केंद्रीय मंत्रीमंडळाचा विस्तार, विविध पेपरफुटींचा विषय यांचा समावेश आहे. या पार्श्वभूमीवर आज अचानक मुख्यमंत्री देवेंद्र फडणवीस दिल्लीला रवाना झाले. तर, दुसरीकडे उद्या केंद्रीय गृहमंत्री अमित शहा मुंबईच्या दौऱ्यावर असून ते पत्रकार परिषदही घेणार आहेत. त्यामुळे सरकारमध्ये नेमक काय सुरु आहे. याबाबत उलटसुलट चर्चा सुरु झाल्या आहेत.

पंतप्रधान नरेंद्र मोदी यांच्या वाढदिवसानिमित्त आणि त्यांच्या घटनात्मक पदावरील कारकीर्दीला २५ वर्षे पूर्ण झाल्याबद्दल भाजपकडून 'सेवा संकल्प अभियान' राबवले जाणार आहे. १७ सप्टेंबर ते १७ ऑक्टोबर या महीन्याभराच्या कालावधीत हे अभियान सर्व देशभरात राबविले जाणार आहे. या अभियानाची माहिती देण्यासाठी गृहमंत्री मुंबईत येणार असल्याचे सांगितले आहे. यावेळी राज्याचे मुख्यमंत्री देवेंद्र फडणवीस, प्रांताध्यक्ष रविंद्र चव्हाण यांच्याबरोबरच महत्वाचे नेते उपस्थित राहणार आहेत. त्यामुळे अभियाना व्यतिरिक्त ते कुठल्या मुद्द्यावर बोलणार हे महत्वाचे आहे.

देशात होणारी पुढील लोकसभेची निवडणूक नरेंद्र मोदी लढवणार का? याची चर्चा आतापासूनच राजकीय वर्तृळात रंगली आहे. मोदी हेच पुढील पंतप्रधान पदाचे दावेदार असल्याचे पक्षाकडून सांगितले जात आहे. त्यांचा वाढदिवस हा सेवा संकल्प दिवस म्हणून साजरा होतो आहे. त्यात केंद्रात लवकरच मंत्रीमंडळ विस्तार करण्यात येणार असल्याच्या चर्चा आहेत. देवेंद्र फडणवीस यांच्या दिल्ली भेटीनंतर ते या मंत्रीमंडळ विस्तारात काही मुख्य भूमिका पार पाडणार किंवा कुणाची शिफारस करणार का? याबाबत उत्सुकता असणार आहे.

देवेंद्र फडणवीस यांनी आपण महाराष्ट्रातच कार्यरत राहणार आहोत असे आधीच स्पष्ट केले आहे. तरी विरोधकांकडून त्यांच्या दिल्ली भेटींवर सातत्याने टीका केली जाते. त्यामुळे मंत्रीमंडळ विस्तार, अमित शहा यांचा मुंबई दौरा आणि स्थानिक नेत्यांची उपस्थिती यावरून येणार्‍या काळात राजकारणात काही वेगळे समीकरण पाहायला मिळण्याची शक्यता आहे.