भाजपच्या खात्यांना जास्त निधी? फडणवीसांनी पत्रकार परिषदेत स्पष्टच सांगितले

Devendra Fadnavis : मुंबई : शिंदे सरकारच्या खातेवाटपामध्ये सर्व महत्त्वाची खाती भाजकडे (BJP) गेली. शिंदे गट फक्त नावालाच आहे, अशी टीका विरोधी पक्षांनी केली होती. तसेच भाजपच्या खात्यांना 80 टक्के निधा आहे तर शिंदे गटाकडील खात्यांना फक्ट २० टक्के निधी आहे, असल्याची चर्चा राजकीय वर्तुळात रंगली होती. यावर उपमुख्यमंत्री देवेंद्र फडणवीस (Devendra Fadnavis) यांनी उत्तर दिले.

उद्यापासून सुरु होणाऱ्या पावसाळी अधिवेशनाच्या पूर्वसंध्येला मुख्यमंत्री एकनाथ शिंदे (Eknath Shinde) आणि देवेंद्र फडणवीस यांनी पत्रकार परिषद घेतली. त्यावेळी फडणवीस बोलत होते. यावेळी फडणवीस म्हणाले, भाजपचे 115 आमदार आहेत, एकनाथ शिंदे यांच्यासोहत 50 आमदार आहेत. त्यामुळे 60 टक्के निधी भाजपच्या खात्याना आहे. तर 40 टक्के निधी एकनाथ शिंदे गटाच्या शिवसेनेला आहे, असे फडणवीस यांनी सांगितले.

तसेच महाविकास आघाडी सरकारमध्ये उद्धव ठाकरे मुख्यमंत्री असताना शिवसेनेला (SHivsena) फक्त 12.80 टक्के मिळाला होता, असेही त्यांनी सांगितले. आता 40 टक्के निधी शिंदे गटाला दिला आहे, असे फडणवीसांनी स्पष्ट केले. मात्र, गृह, अर्थ, महसूल, आदिवासी कल्याण आदी महत्त्वाची खाची भाजपकडे आहेत.

दरम्यान, शिवसेना पक्षप्रमुख उद्धव ठाकरे (Uddhav Thackeray) यांनी मुख्यमंत्री पदाचा राजीनामा दिला त्यावेळी विधान परिषदेच्या आमदारकीचाही राजीनामा देणार असल्याचे त्यांनी जाहीर केले होते. मात्र, ठाकरे यांनी अद्याप राजीनामा दिल्या नसल्याचे समोर आले आहे. यावरुन देवेंद्र फडणवीस यांना प्रश्न विचारला असता ते म्हणाले, उद्धव ठाकरे यांनी राजीनाम्याची घोषणा बंद खोलीत केली असावी, असा खोचक टोला लगावला.