Cabinet Expansion 2023 : तीन इंजिनचे सरकार मजबूत, पण केव्हाही कोसळू शकते; शिंदे गटातील आमदाराच्या वक्तव्याने खळबळ

Bacchu Kadu News : राष्ट्रवादी काँग्रेसचे (NCP) नेते अजित पवार यांनी उपमुख्यमंत्री पदाची शपथ घेतल्यामुळे शिंदे गटात नाराजी आहे. त्यामुळे राष्ट्रवादीच्या मंत्र्यांचा शपथविधी होऊन 10 दिवस उलटले तरी खातेवाटप जाहीर झालेले नाही. शिंदे गटातील आमदार आपली नाराजी उघडपणे व्यक्त करत आहेत. यातच आमदार बच्चू कडू यांनी केलेल्या वक्तव्यामुळे राजकीय वर्तुळात मोठी खळबळ उडाली आहे.

बच्चू कडू यांनी माध्यमांशी संवाद साधला, यावेळी कडू म्हणाले, राज्यातील तीन इंजिनाचे सरकार मजबूत आहे. मात्र, ते केव्हाही कोसळू शकते. पण मुख्यमंत्री एकनाथ शिंदे ते सरकार मजबूत करण्याचा प्रयत्न करतील. बच्चू कडू (Bacchu Kadu) यांनी केलेल्या वक्तव्यामुळे या विषयाची चांगलीच चर्चा रंगली आहे.

अजित पवार व त्यांच्या समर्थकांच्या सरकारमधील समावेशामुळे शिंदे यांच्यापुढील समस्यांत कमालीची वाढ झाली आहे. राष्ट्रवादीच्या सरकारमधील समावेशामुळे शिंदे गटातील आमदारांमध्ये अस्वस्थता आहे. तसेच भाजपाचेही काही आमदार नाराज असल्याची चर्चा आहे. या पार्श्वभूमीवर कडू यांनी मनातील खदखद व्यक्त केली आहे.

बच्चू कडू म्हणाले, अजित पवारांना (Ajit Pawar) अर्थमंत्रीपद मिळू नये अशी काही आमदारांची इच्छा आहे. महाविकास आघाडीच्या काळात अर्थमंत्रीपदी असताना त्यांनी निधीची पळवापळवी केली. त्यामुळेच आम्ही इकडे आलो होते. आम्ही अजित पवार यांचा आमच्या मतदारसंघातील हस्तक्षेप सहन करणार नाही. हे आता तीन इंजिनाचे सरकार आहे. ते मजबूत आहे, मात्र, केव्हाही कोसळू शकते, असे कडू म्हणाले आहेत.

दरम्यान, मंत्रिपदाच्या खातेवाटपावर मुंबईमध्ये मुख्यमंत्री एकनाथ शिंदे (Eknath Shinde), उपमुख्यमंत्री देवेंद्र फडणवीस आणि उपमुख्यमंत्री अजित पवार यांच्यामध्ये अनेक बैठका झाल्या. मात्र, या बैठकांमध्ये कुठलाही तोडगा निघाली नाही. त्यामुळे अजित पवार दिल्लीला गेले आहेत. दिल्लीमध्ये केंद्रीय मंत्री अमित शाह यांच्याशी अजित पवार चर्चा करण्याची शक्यता आहे.

Edited by : Amol Jaybhaye