राजकारण्यांचे धाबे दणाणले; अधिवेशनात एका पाठोपाठ आमदार अन् दोन मंत्री कोरोना पॉझिटिव्ह

मुंबई : विधिमंडळ अधिवेशनात (Assembly Session) कोरोनाचा (Covid-19) शिरकाव झाला आहे. आमदार समीर मेघे, आदिवासी विकास मंत्री के.सी.पाडवी यांच्यानंतर आता शालेय शिक्षणमंत्री वर्षा गायकवाड (Varsha Gaikwad) यांना कोरोनाची लागण झाली आहे. विशेष म्हणजे त्या नियमितपणे अधिवेशनाला हजेरी लावत होत्या. विधिमंडळात कोरोनाचा प्रादुर्भाव वाढू लागल्याने मंत्र्यांसह आमदार धास्तावले आहेत.

विधिमंडळ अधिवेशनाला लावलेले भाजपचे आमदार समीर मेघे हे सुरवातीला कोरोना पॉझिटिव्ह आढळले होते. त्यानंतर आदिवासी विकास मंत्री के.सी.पाडवी यांनाही कोरोनाचा संसर्ग झाल्याचे समोर आले होते. पाडवी हेसुद्धा अधिवेशनाला उपस्थित होते. सरकारची यामुळे चिंता वाढलेली असताना आज वर्षा गायकवाड या कोरोना पॉझिटिव्ह आल्याची माहिती त्यांनीच ट्विटरवर दिली आहे.

वर्षा गायकवाड म्हटले आहे की, मी कोरोना पॉझिटिव्ह असल्याचे आज समोर आले आहेत. काल सायंकाळपासून मला लक्षणे दिसून येत होती. मला सौम्य लक्षणे आहेत. माझी तब्येत बरी असून, मी सध्या विलगीकरणात आहे. मला मागील काही दिवसांत भेटलेल्या व्यक्तींनी काळजी घ्यावी, अशी विनंती मी करते.

डेल्टाच्या जागी आता ओमिक्रॉनचा प्रादुर्भाव वाढू लागला आहे. यामुळे तिसरी लाट (Third Wave) पुढील वर्षाच्या सुरवातीला येईल, अशी माहिती नॅशनल कोविड-19 सुपरमॉडेल कमिटीने केंद्र सरकारला दिली आहे. या समितीचे अध्यक्ष हे प्रा. विद्यासागर हे आहेत. त्यांनी म्हटले आहे की, भारतात ओमिक्रॉनमुळे कोरोनाची तिसरी लाट येणार आहे. परंतु, ही लाट दुसऱ्या लाटेपेक्षा सौम्य असेल. तिसरी लाट भारतात पुढील वर्षीच्या सुरवातीला येईल. ही लाट फेब्रुवारी महिन्यात उच्चांकी पातळीवर पोचेल.