ठाकरे आता थेट भिडले; आधी बारा अन् आता आणखी पाच आमदारांवर अपात्रतेचे संकट

मुंबई : मुख्यमंत्री उद्धव ठाकरे (Uddhav Thackeray) आता शिवसेनेतील बंडखोर एकनाथ शिंदे गटाला थेट भिडले आहेत. सुरूवातीला त्यांनी शिंदे यांची गटनेता पदावरून हकालपट्टी करत अजय चौधरी यांची नियुक्ती केली होती. त्यानंतर गुरूवारी बारा आमदारांचे निलंब करण्याचे पत्र विधानसभा उपाध्यक्षांना दिले होते. आता आणखी पाच आमदारांना निलंबित करण्याची मागणी सेनेकडून उपाध्यक्षकांकडे केली आहे. (Eknath Shinde Latest Marathi News)

शिवसेनेतील बंडाच्या नाट्यातील दुसऱ्या अंकाची ही सुरूवात आहे. सुरूवातीला शिंदे यांची मनधरणी करण्यासाठी ठाकरेंकडून प्रयत्न करण्यात आले. पण त्यानंतरही शिंदे माघार घेण्यास तयार नसल्याने आता कारवाईचा बडगा उगारण्यास सुरूवात केली आहे.

शिंदे यांच्या गटात असलेल्या सुमारे 40 आमदारांपैकी 12 आमदारांवर अपात्रतेची कारवाई करण्याचे पत्र सेनेकडून विधानसभा उपाध्यक्ष नरहरी झिरवळ यांना दिले आहे. बारा बंडखोर आमदारांवर पक्षाचा ‘व्हीप’ डावलल्याचा ठपका ठेवून त्यांच्यावर अपात्रतेची कारवाई करण्याची मागणी करणारे पत्र विधानसभा उपाध्यक्ष नरहरी झिरवाळ यांना पाठवले आहे.

त्यानंतर आता शुक्रवारी त्यामध्ये आणखी पाच आमदारांची भर पडली आहे. सदा सरवणकर, प्रकाश आबिटकर, संजय रायमुलकर, बालाजी कल्याणकर, रमेश बोरणारे यांचे निलंबन करण्याची मागणी सेनेकडून करण्यात आल्याचे समजते.

गुरूवारी एकनाथ शिंदे, महेश शिंदे, अब्दुल सत्तार, संदिपान भुमरे, भरत गोगावले, संजय शिरसाट, यामिनी जाधव, लता सोनवणे, अनिल बाबर, बालाजी किणीकर, तानाजी सावंत आणि प्रकाश सुर्वे यांच्यावर कारवाई करण्याचे पत्र देण्यात आले होते.