Eknath Shinde: शरद पवारांच्या 'त्या' विधानामुळं एकनाथ शिंदे खूष! म्हणाले, चांगल्याला चांगलं...

Eknath Shinde: महाराष्ट्र शासनानं जून २०२६ मध्ये राज्य मंत्रिमंडळ बैठकीत पुण्यश्लोक अहिल्यादेवी होळकर शेतकरी कर्जमुक्ती योजना २०२६ मंजूर केली. यात सुमारे ५६ लाख शेतकऱ्यांना ₹३६,५८५ कोटी रुपयांची कर्जमाफी देण्यात येणार आहे. ही योजना अल्पमुदत पीक कर्जासाठी लागू असणार आहे. या कर्जमाफी योजनेचं शरद पवारांनी कौतुक केलं आहे. त्यांच्या कौतुकाच्या थापेमुळं मुख्यमंत्री फडणवीस आणि उपमुख्यमंत्री शिंदे हे खूष आहेत. त्यामुळं एकनाथ शिंदे यांनी पवारांच्या या कौतुकावर प्रतिक्रिया दिली आहे.

शरद पवारांनी नेमकं काय म्हटलंय?

शरद पवार म्हणाले, सरकारच्या निर्णयामुळं राज्यातील लाखो शेतकऱ्यांना मोठा फायदा होणार आहे. सुरुवातीला असलेल्या जाचक अटी सरकारनं मागे घेतल्यामुळं त्यांनी मुख्यमंत्र्यांचे आभार मानले आहेत. हा निर्णय शेतकऱ्यांच्या हिताचा आणि त्यांच्या भावनांचा आदर करणारा असल्याचंही शरद पवार यांनी म्हटलं आहे.

एकनाथ शिंदेंकडून कौतुक

दरम्यान, एकीकडं शेतकरी कर्जमाफी योजनेच्या जाचक अटींवरुन विरोधकांनी सरकारला घेरलेलं असतानाच आता शरद पवारांनी कौतुक केल्यामुळं एकनाथ शिंदेही खूष आहेत. त्यांनी म्हटलं की, महायुती सरकार नेहमीच शेतकऱ्यांच्या मागे उभं राहीलं आहे. राज्याच्या तिजोरीवर शेतकऱ्यांचा पहिला अधिकार आहे. आम्ही या योजनेतील ५० हजारांची अट कमी केली. त्यामुळं लाखो शेतकऱ्यांचं दोन लाखांपर्यंत कर्ज माफ होणार आहे. यामुळं शेतकऱ्यांना मोठा दिलासा मिळाला आहे.

शरद पवार हे ज्येष्ठ नेते आहेत, ते चांगल्याला चांगलं म्हणणारे नेते आहेत. काही लोकांची सरकारनं कितीही चांगलं काम केलं तरी खोटं बोला पण रेटून बोला अशी वृत्ती विरोधी पक्षातील काही लोकांची आहे. त्याला पवार साहेब यांनी हे उत्तर दिलं आहे, असं एकनाथ शिंदे यांनी म्हटलं आहे.