Shivsena Politics : 'आनंद दिघे नेते, उपनेते नव्हते...', PM मोदींच्या वाढदिवसानिमित्त दिलेल्या जाहिरातीमधील फोटोवरून नवा वाद, दोन्ही शिवसेना आक्रमक

Mumbai News, 19 Sep : देशाचे पंतप्रधान नरेंद्र मोदी यांच्या वाढदिवसानिमित्त उपमुख्यमंत्री एकनाथ शिंदेंच्या शिवसेनेकडून वृत्तपत्रांध्ये एक शुभेच्छा देणारी एक जाहिरात देण्यात आली होती. या जाहिरातीत शिवसेनाप्रमुख बाळासाहेब ठाकरे यांच्या शेजारी आनंद दिघे यांचा फोटो लावण्यात आला होता.

या फोटोवरूनच नव्या वादाला तोंड फुटलं आहे. हिंदूहृदयसम्राट बाळासाहेब ठाकरेंच्या बाजूला जिल्हाप्रमुख असलेल्या आनंद दिघेंचा फोटो लावून तुम्ही काय साध्य करताय? असा सवाल खासदार संजय राऊत यांनी उपस्थित केला आहे.

दिघे नेते, उपनेते नव्हते, ते फक्त जिल्हाप्रमुख होते. बाळासाहेबांचं महत्त्व कमी करण्यासाठी शिंदेंचा हा राष्ट्रीय कट असल्याचा आरोपही राऊतांनी केला आहे. तर राऊतांच्या या टीकेनंतर शिंदेंची शिवसेना चांगली आक्रमक झाली आहे.

राऊतांनी आनंद दिघेंबाबत केलेल्या वक्तव्यानंतर ठाण्यात शिंदेंच्या शिवसेनेचे कार्यकर्त्यांनी टेंभीनाका येथील आनंद आश्रम इथे आंदोलन करत संजय राऊतांचा पुतळा जाळला. तर दिघेसाहेब खोट्या वृत्तीच्या लोकांना कळणार नाहीत, असा पलटवार उपमुख्यमंत्री एकनाथ शिंदेंनी केला आहे.

तर शिंदेंच्या शिवसेनेचे खासदार नरेश मस्के म्हणाले, संजय राऊत हे बिनकामाचे आहेत. धर्मवीर आनंद दिघे यांच्यावर हे टीका करतात. आनंद दिघेंच्या लोकप्रियतेवर हे जळतात म्हणून अशा पद्धतीने आरोप करत आहेत.

बाळासाहेबांचा अपमान कसा?

दरम्यान, बाळासाहेबांची जागा कुणीही घेऊ शकत नाही. पण आनंद दिघेंनी ठाणे, पालघरमध्ये मोठं काम केलं. एकनाथ शिंदेंनी त्यांना गुरुस्थानी मानलं. मग आनंद दिघेंचा फोटो लावणे हा बाळासाहेबांचा अपमान कसा? असा प्रश्न राज्यमंत्री योगेश कदम यांनी उपस्थित केला.