शिवसेनेतील नवी पदाधिकारी निवड ठाकरेंसाठी ठरली डोकेदुःखी

मुंबई : शिवसेनेने (shivsena) नुकतीच चेंबूरमधील (Chembur) नवीन पदाधिकाऱ्यांच्या नियुक्त्या जाहीर केल्या आहेत. मात्र, नवी पदाधिकारी निवड शिवसेना पर्यायाने शिवसेना पक्षप्रमुख उद्धव ठाकरे (Uddhav Thackeray) यांची डोकेदुखी ठरली आहे. कारण, या नवीन नियुक्‍त्‍यांमुळे चेंबूरमधील काही शिवसैनिकांमध्‍येही नाराजी पाहायला मिळत आहे. शिंदे गट अगोदरच बाहेर पडला आहे, त्यात शिवसैनिकांमधील नाराजी पक्षाला परवडणारी नाही. त्यामुळे पक्षप्रमुख यातून कसा मार्ग काढतात, हे पाहावे लागणार आहे. (Election of new office bearers in Shiv Sena turned out to be a headache for Thackeray)

शिवसेनेला जोमाने उभे करण्याकरीता आदित्य ठाकरे यांनी शिवसंवाद यात्रा सुरू केली आहे. त्‍यातच शिवसेना पक्षप्रमुख उद्धव ठाकरे यांच्या आदेशानुसार चेंबूर विधानसभा क्षेत्रातील नव्या पदाधिकाऱ्यांच्या नियुक्त्या जाहीर झाल्या आहेत. मात्र, या नव्याने नियुक्त्या कोणाच्या सांगण्यानुसार करण्यात आल्या, याचा बोलविता धनी कोण, असा सवाल काही नाराज माजी पदाधिकारी करीत आहेत. या नाराज पदाधिकाऱ्यांनी थेट चेंबूर नाका येथील शिवसेनेचे मध्यवर्ती कार्यालय गाठून आपली नाराजी व्यक्त केली. त्‍यामुळे शिवसेनेपुढील अडचणी वाढत असल्‍याचे दिसत आहे. दरम्‍यान, या संदर्भात शिवसेनेचे स्थानिक आमदार प्रकाश फातर्पेकर यांच्याशी संपर्क न झाल्‍याने त्‍यांची प्रतिक्रिया मिळू शकलेली नाही.

चेंबूर विधानसभा क्षेत्रात शिवसेनेच्या पदाधिकाऱ्यांमध्ये अंतर्गत बदल झाले आहेत. चेंबूर कॅम्पमधील शाखा क्रमांक १५४ मधून सुरेश माने, तर माहुल वाशीनाका परिसरातील शाखा क्रमांक १५५ मधून संजय राठोड यांच्याऐवजी दोन नवीन शाखाप्रमुखांची नियुक्ती करण्यात आली आहे. शाखाप्रमुख चांगले कार्य करीत असताना त्यांची उचलबांगडी करण्यात आल्याने शिवसैनिक नाराज असल्‍याची चर्चा येथे सुरू झाली आहे.

नवीन पदाधिकारी निवड आणि शिवसैनिकांमधील नाराजीसंदर्भात शिवसेनेचे विभागप्रमुख मंगेश सातमकर म्हणाले की, नव्या पदाधिकाऱ्यांच्या नियुक्तांबाबत आपल्याला कोणतीही कल्पना नाही. याबाबत शिवसेना पक्षप्रमुखांची भेट घेऊन त्याबाबत चर्चा करणार आहोत.