Ajit Pawar : अजितदादांची बनावट सही करायचा अन् स्वत: सरकारी अधिकारी असल्याचं सांगून करायचा फसवणूक

Mumbai News, 12 Jan : उपमुख्यमंत्री अजित पवार (Ajit Pawar) यांची बनावट सही करून स्वतःला त्यांचा विशेष कार्य अधिकारी असल्याचं सांगत एका व्यक्तीने लोकांची फसवणूक केल्याचा धक्कादायक प्रकार उघडकीस आला आहे. तर अजितदादांच्या नावाचा गैरवापर करणाऱ्या आरोपीला पोलिसांनी बेड्या ठोकल्या आहेत.

उपमुख्यमंत्री एकनाथ शिंदे (Eknath Shinde) यांच्या लेटरहेड आणि शिक्क्याचा वापर करून एका आरोपीने फसवणूक केल्याचं प्रकरण ताज असतानाच आता अजित पवारांच्या सही आणि लेटरहेडचा देखील गैरवापर झाल्यामुळे एकच खळबळ उडाली आहे.

नेमकं प्रकरण काय?

उपमुख्यमंत्री अजित पवार (Ajit Pawar) यांचा विशेष कार्य अधिकारी असल्याचं सांगत एक व्यक्ती अजित पवारांच्या बनावट सह्या करत होता. या आरोपीने अजितदादांचं बनावट लेटरहेड देखील बनवलं होतं. अजित पवारांची बनावट सही करणारा आणि त्यांचा विशेष कार्य अधिकारी असल्याचं सांगणार्‍या प्रवीण साठे (वय 42) या आरोपीला पोलिसांनी अटक केली आहे.

साठे हा मूळचा सातारचा असल्याची माहिती आहे. तर तो सरकारी अधिकारी असल्याचं सांगत लोकांची आर्थिक फसवणूक करत असल्याची तक्रार पुण्यातील अतुल शितोळे यांनी मलबार हिल पोलिसांकडे दिली आहे. त्यानुसार आता साठेवर गुन्हा दाखल करण्यात आला आहे. तर त्याने अजित पवारांच्या सहीद्वारे किती आणखी किती जणांची फसवणूक केली आहे याचा तपास पोलिस करत आहेत.

दरम्यान, आज पुणे दौऱ्यावर असलेल्या अजितदादांना पत्रकारांनी धनंजय मुंडे यांच्या राजनाम्याबाबतचा प्रश्न विचारताच ते काहीसे भडकल्याचं पाहायला मिळालं. धनंजय मुंडे यांच्या राजीनाम्याची मागणी सातत्याने होत असताना अजित पवार त्यांना पाठीशी घालत आहेत का? असा प्रश्न विचारला असता पत्रकारांच्या प्रश्नावर अजितदादा भडकले. ते म्हणाले, चौकशीत नाव आली तर होईल सर्वाची चौकशी. परंतु धनंजय मुंडे यांचं नाव नसतानाच कशी चौकशी होईल. तुझं नाव नसताना तुझी चौकशी होईल का? असा उलटप्रश्न त्यांनी पत्रकाराला केला.